សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បន្ទាប់ពីមានករណីក្រុមក្មេងស្ទាវ២ក្រុមបានបើកការកាប់ប្រហារគ្នា ព្រោះតែរឿងទំនាស់ពាក្យសម្តីក្នុងវង់ផឹកសុីបណ្តាលឲ្យភាគីម្ខាងបានស្លាប់ក្រោយពីបញ្ជួនដល់មន្ទីរពេទ្យព្រះកុសុមៈ(ពេទ្យលោកសង្ឃ) និងម្នាក់ទៀតរងរបួសធ្ងន់ កាលពីម៉ោង១រំលងអធ្រាត្រ ថ្ងៃចន្ទ ៨ កើត ខែបុស្ស ឆ្នាំ រកា នព្វស័ក ព.ស ២៥៦១ ត្រូវនឹងថ្ងៃទី ២៥ ខែធ្នូ ឆ្នាំ ២០១៧ ខែធ្នូ ឆ្នាំ០១៧ នៅភូមិសែនសុខ សង្កាត់ឃ្មួញខណ្ឌសែនសុខ ។
លោកអនុសេនីយ៍ឯក ញាណ នន នាយប៉ុស្តិ៍នគរបាលរដ្ឋបាលឃ្មួញ បាននិយាយថា មូលហេតុករណីទំនាស់នេះ គឺភាគីជនរងគ្រោះមានទំនាស់ពាក្យសំដីគ្នាជាមួយភាគីខាងបង្កហេតុនៅក្នុងវង់ផឹកស៊ីមួយ ប៉ុន្តែបានសម្របសម្រួលគ្នាចប់អស់ម្តងហើយ រួចក៏បែកផ្លូវគ្នារៀងៗខ្លួន។
លោកបន្តថា៖ ក្រោយមកខាងភាគីខាងជនបង្ក បាននាំបក្ខពួកទៅផឹកស៊ីបន្តទៀតនៅកន្លែងផ្សេងមានគ្នា៣នាក់ ១.ឈ្មោះ ថន ចាន់ណាក់ ហៅខ្មៅ អាយុ១៧ឆ្នាំ ។ ២.ឈ្មោះឡេង សុភ័ស្ត អាយុ៣២ឆ្នាំ។ ៣. ឈ្មោះ ហេង ចន្ថា អាយុ៣៧ឆ្នាំ នាំគ្នាកាន់ដាវ ដែកទីប និងដំបងឈើ មកស្ទាក់កាប់ភាគីទី១ស្លាប់ម្នាក់នៅតាមផ្លូវ ។ សពឈ្មោះ ហេង ដារ៉ា(ហៅចិត្រា) បន្ទាប់មកជនបង្កនាំគ្នាទៅតាមស្រែកហៅគូទំនាស់ម្នាក់ទៀតឈ្មោះ ប្រាក់ សុខុន ដល់មុខផ្ទះស្រែកថា អញសម្លាប់គ្នាពួកឯងបានម្នាក់ហើយ ឯងខ្លាំងចេញពីក្នុងផ្ទះមក ពេលនោះជនរងគ្រោះបើកទ្វារចេញមកក៏ត្រូវក្រុមជនបង្កកាប់រងរបួសធ្ងន់តែម្តង រួចគេចខ្លួនពីកន្លែងកើតហេតុបាត់។
លោក នន បានមានប្រសាសន៍ថា៖ រឿងរ៉ាវនេះ លោកបានទទួលពត៌មាននៅម៉ោង១រំលងអធ្រាត្រទៅហើយ លោកបានបោះដៃតាមវិទ្យុទាក់ទងភ្លាមៗនាំកងកម្លាំងទៅជួយអន្តរាគមន៍ដឹកជនរងគ្រោះទៅមន្ទីរពេទ្យ តែក្រោយមក នៅវេលាម៉ោង៥ព្រឹក ជនរងគ្រោះម្នាក់ឈ្មោះ ហេង ដារ៉ា បានស្លាប់នៅមន្ទីរពេទ្យព្រះកុសុមៈ។
មន្ត្រីនគរបាលបានបញ្ជាក់ថា កម្លាំងព្រហ្មទណ្ឌអធិការខណ្ឌសហការជាមួយនគរបាលប៉ុស្តិ៍ឃ្មួញបានចុះភ្លាមៗទាំងយប់ ឃាត់ខ្លួនជនពាក់ព័ន្ឋចំនួន៦នាក់ផ្សេងទៀត នៃភាគីទាំង២នោះ យកមកសាកសួរនៅអធិការដ្ឋានដើម្បីរកមុខជនដៃដល់មកផ្តន្ទាទោស តាមច្បាប់ ។
ជនសង្ស័យភាគីខាងបង្កមាន៣នាក់ ១.ឈ្មោះ ថន ដាណាក់ ហៅខ្មៅ អាយុ១៧ឆ្នាំ នៅភូមិសែនសុខ៥ ។ ២.ឈ្មោះ ឡេង សុភ័ណ្ឌ ហៅក្រូច អាយុ៣២ឆ្នាំ នៅភូមិសែនសុខ៤។ ៣. ឈ្មោះ ខេង ចន្ថា ហៅណៃ អាយុ៣៧ឆ្នាំ នៅភូមិសែនសុខ៥។
គូកនភាគីជនរងគ្រោះ មាន ១.ឈ្មោះ ប្រាក់ សុជាតិ អាយុ១៦ឆ្នាំ នៅភូមិសែនសុខទី៤ ។ ២.ឈ្មោះ នង ដារ៉ា ហៅប៉ាវ អាយុ១៧ឆ្នាំ នៅភូមិសែនសុខ៦ ។ ៣.ឈ្មោះ សឹុម ហើយ អាយុ២៣ឆ្នាំ នៅភូមិសែនសុខ៤ សង្កាត់ឃ្មួញ។ នៅកន្លែងកើតហេតុ ប៉ូលិសបានប្រមូលវត្ថុតាង មានដាវកែច្នៃ១ ដំបងដែកទីប ដំបងឈើ។
លោក គួក សុខហួរ អធិការរងនគរបាលខណ្ឌសែនសុខបានឲ្យដឹងថា ករណីខាងលើនេះ សមត្ថកិច្ចបានឃាត់ខ្លួនភាគីទាំង២ចំនួន៦នាក់ ហើយកំពុងបន្តតាមចាប់បក្ខពួកក្រុមជនសង្ស័យបន្តទៀត៕ តុង សីហា
