សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានរងរបួសធ្ងន់ត្រូវបានរថយន្តសង្គ្រោះដឹកទៅមន្ទីរពេទ្យភ្លាមតែដោយអកុសល ក៏បានស្លាប់ពេលបញ្ជូនទៅដល់មន្ទីរពេទ្យ ខណៈកំពុងជិះម៉ូតូហើយត្រូវបនរថយន្តទេសចរណ៍បើកបុកពេញទំហឹង កាលពីវេលាម៉ោង១និង២០នាទីរំលងអាធ្រាត ឈានចូល ថ្ងៃចន្ទ ៥កើត ខែផល្គុន ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី១៩ ខែកុម្ភៈ ឆ្នាំ២០១៨ ស្ថិតតាមបណ្ដោយផ្លូវជាតិលេខ៤ ត្រង់ចំណុចអគ្គបញ្ជាការជើងគោក ក្នុងសង្កាត់ចោមចៅ៣ ខណ្ឌពោធិ៍សែនជ័យ ។
ជនរងគ្រោះមានឈ្មោះសួង បួន អាយុ៣០ឆ្នាំ មុខរបរជាងភ្លើង ស្នាក់នៅតំបន់សេដ្ឋកិច្ចពិសេស មានស្រុកកំនើតស្រុកត្រាំកក់ ខេត្តតាកែវ ។
តាមសក្សីនៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញម៉ូតូម៉ាកហុងដាឌ្រីមសង់ ស៊េរីឆ្នាំ017ពណ័ខ្មៅពាក់ស្លាកលេខភ្នំពេញ 1GE-5543 បើកដោយបុរសម្នាក់ ធ្វើដំណើរតាមបណ្តោយផ្លូវជាតិលេខ៤ក្នុងទិសដៅពី កើតទៅលិច ខណៈមកដល់ចំណុចកើតហេតុក៏មានរថយន្តទេសចរណ៍ ពណ៌ស លាយក្រហម ពាក់ស្លាកលេខភ្នំពេញ 3E-1474 ក្នងល្បឿនលឿនក៏ បានជ្រុលចង្កូតទៅបុកម៉ូតូពេញទំហឹងបណ្ដាលជនរងគ្រោះរងរបួសធ្ងន់ធ្ងរ ភ្លាមនោះម្ចាស់រថយន្តបង្កបានបើកទ្វារថយន្ត រត់គេចបាត់ស្រមោល បន្សល់ទុករថយន្ត នៅកន្លែងកើតហេតុ និងភ្ញៀវដែលជិះក្នុងរថយន្តជាច្រើននាក់ ។ បន្ទាប់មកជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យតែដោយអកុសល ក៏បានស្លាប់ពេលបញ្ជូនទៅដល់មន្ទីរពេទ្យ ។
ក្រោយពេលកើតហេតុសមត្ថកិច្ចមូលដ្ឋានបាន មកដល់កន្លែងកើតហេតុ ធ្វើការវាស់វែងយករថយន្តបង្ក និងម៉ូតូរងគ្រោះខាងលើទៅរក្សាទុក រង់ចាំដោះស្រាយតាមផ្លូវច្បាប់ ។ ចំណែកសាសពសមត្ថកិច្ច ប្រគល់ឲ្យក្រុមគ្រួសារយកទៅ ស្រុកកំណើតធ្វើបុណ្យតាមប្រពៃណី ៕ សុខាសែនជ័យ
