សារព័ត៌មាន នគរវត្ត តែងតែនាំមុខគេជានិច្ច
ប្រភពពីប្រជានេសាទរស់នៅក្នុងឃុំមេទឹក ស្រុកបាកាន ខេត្តពោធិ៍សាត់ បានឲ្យដឹងថា ក្នុងមូលដ្ឋានពួកគាត់កំពុងកើតមានបទល្មើសនេសាទប្រើឧបករណ៍ខុសច្បាប់ទ្រង់ទ្រាយធំយ៉ាងរាលដាលពេញផ្ទៃបឹងទន្លេសាប ហើយមិនទាន់ឃើញមន្ត្រីរដ្ឋបាលជលផលនិងសមត្ថកិច្ចពាក់ព័ន្ធចាត់វិធានការបង្ក្រាបនោះទេ។ ប្រភពបានឲ្យដឹងទៀតថា ឈ្មួញដែលជាអ្នករត់ការបើកដៃឲ្យឈ្មួញអាចប្រើឧបករណ៍ខុសច្បាប់ចាប់ត្រីក្នុងបឹងទន្លេសាបយ៉ាងមហន្តរាយ គឺឈ្មោះ កុយ តាំងលី ដែលមានទំនាក់ទំនងយ៉ាងជិតស្និទ្ធជាមួយមន្ត្រីរដ្ឋបាលជលផលនិងសមត្ថកិច្ចពាក់ព័ន្ធ។ ការដែលឈ្មួញឈ្មោះ កុយ តាំងលី អាចធ្វើអ្វីៗតាមអំពើចិត្ត គឺមានការឃុបឃិតសម្របសម្រួលពីសំណាក់លោក ភេម សុខុន នាយសង្កាត់រដ្ឋបាលជលផលបាកាន ដែលគិតតែពីរឿងប្រមូលលុយធ្វើមានធ្វើបានផ្ទាល់ខ្លួនយ៉ាងសុខស្រួល។
មន្ត្រីអាជ្ញាធរមូលដ្ឋានក្នុងភូមិព្រែកក្រ ឃុំមេទឹក ស្រុកបាកាន ខេត្តពោធិ៍សាត់ បានឲ្យដឹងថា បច្ចុប្បន្ននៅតំបន់អតីតឡូត៍នេសាទលេខ២ កំពុងកើតមានបទល្មើសនេសាទប្រើឧបករណ៍ខុសច្បាប់យ៉ាងអនាធិបតេយ្យ ហើយឈ្មួញឈ្មោះ កុយ តាំងលី ជាអ្នកគ្រប់គ្រងក្រុមជនល្មើសប្រើឧបករណ៍ខុសច្បាប់។ ប្រជានេសាទជាលក្ខណៈគ្រួសារនៅតំបន់បឹងទន្លេសាបនៃឃុំមេទឹក បានឲ្យដឹងថា បទល្មើសប្រើឧបករណ៍ខុសច្បាប់ដូចជាដាយ ប, ឧបករណ៍ឆក់ កំពុងរាលដាលកាន់តែខ្លាំងព្រោះលោក ភេម សុខុន នាយសង្កាត់រដ្ឋបាលជលផលបាកាន គឺជាអ្នកឃុបឃិតបើកដៃឲ្យឈ្មួញឈ្មោះ កុយ តាំងលី និងក្រុមជនល្មើសធ្វើអ្វីៗស្រេចតែអំពើចិត្តគ្មានញញើតអ្វីទាំងអស់។
ប្រភពពីមន្ត្រីរាជការក្នុងមន្ទីរកសិកម្មខេត្តពោធិ៍សាត់ បានឲ្យដឹងថា ការដែលលោក ភេម សុខុន នាយសង្កាត់រដ្ឋបាលជលផលបាកាន ហ៊ានបើកដៃឲ្យឈ្មួញឈ្មោះ កុយ តាំងលី ធ្វើអ្វីៗតាមអំពើចិត្តគឺមានការឃុបឃិតពីសំណាក់លោក ភុំ វិមល នាយខណ្ឌរដ្ឋបាលជលផលខេត្តពោធិ៍សាត់ និងលោក ឡាយ វិសិទ្ធ ប្រធានមន្ទីរកសិកម្មខេត្តពោធិ៍សាត់ តែម្តង។ ប្រសិនបើគ្មានការឃុបឃិតបើកដៃពីសំណាក់លោក ភុំ វិមល និងលោក លាយ វិសិទ្ធ ទេនោះគឺលោក ភេម សុខុន នាយសង្កាត់រដ្ឋបាលជលផលបាកាន មិនហ៊ានធ្វើអ្វីៗស្រេចតែអំពើចិត្តរបស់ខ្លួនដូចសព្វថ្ងៃនេះទេ។ ប្រភពខ្លះបានឲ្យដឹងថាលោក ភេម សុខុន តែងផ្ដល់ផលប្រយោជន៍ទៅឲ្យលោក ភុំ វិមល និងលោក ឡាយ វិសិទ្ធ ជាប្រចាំទើបអាចរក្សាតំណែងជានាយសង្កាត់រដ្ឋបាលជលផលបាកាន យ៉ាងសុខសាន្តហើយបណ្ដោយឲ្យបទល្មើសនេសាទកើតឡើងកាន់តែខ្លាំងក្លាជាងមុនទៅទៀត។
លោក ម៉ៅ ធនិន អភិបាលខេត្តពោធិ៍សាត់ មិនចាត់វិធានការបង្ក្រាបបទល្មើសនេសាទប្រើឧបករណ៍ខុសច្បាប់បំផ្លាញធនធានមច្ឆជាតិក្នុងតំបន់បឹងទន្លេសាបនៃស្រុកបាកាន នោះទេហេតុនេះហើយទើបមានការសង្ស័យថា លោក ម៉ៅ ធនិន ក៏ទទួលបានផលប្រយោជន៍ពីបទល្មើសនេសាទដែលកំពុងកើតឡើងយ៉ាងរាលដាលនោះផងដែរ៕
