សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ នារីវ័យក្មេងស្រស់ស្អាតម្នាក់បានជ្រើសរើងការបញ្ចប់ជីវិតខ្លួនឯងដោយផឹកថ្នាំបាញ់ស្មៅ នៅព្រឹក ថ្ងៃចន្ទ ១៥រោច ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹងនៅថ្ងៃទី១៤ ខែឧសភា ឆ្នាំ២០១៨ នៅត្រង់ចំណុចក្រុមទី៧ ភូមិស្វាយស ឃុំកំរៀង ស្រុកកំរៀង ខេត្តបាត់ដំបង មន្រីនគរបាលខេត្តបាត់ដំបងបានឲ្យដឹងថា ជនរងគ្រោះឈ្មោះ យ៉ុន លីន ភេទ ស្រី អាយុ២១ឆ្នាំ រស់នៅក្រុមទី៧ ភូមិស្វាយស ឃុំកំរៀង ស្រុកកំរៀង ខេត្តបាត់ដំបង ។
មូលហេតុ ខឹងម្តាយស្តីបន្ទោសអោយរឿងដើរលេងយប់ ។ តាមការបញ្ជាក់របស់ឈ្មោះ សន ទូចភេទ ស្រីអយុ ៤១ឆ្នាំ ដែលត្រូវជាម្តាយបង្កើតបាន បញ្ជាក់ថា កាលពីថ្ងៃទី១៣ ខែឧសភា ឆ្នាំ២០១៨ ខ្លួនមិនឃើញកូនស្រីឈ្មោះ យ៉ុន លីន អាយុ២១ឆ្នាំ ទៅធ្វើស្មៅដំឡូងជាមួយខ្លួនឡើយ លុះដល់ម៉ោង១៨នឹង០០នាទី ខ្លួនក៏ឃើញកូនស្រីរបស់ខ្លួនជិះម៉ូតូជាមួយមិត្តភក្តិ ហើយខ្លួនក៏បាននិយាយថា កូនចង់ទៅណា ហើយកូនស្រីខ្លួនក៏បានតបថា ទៅដើរលេង ហើយខ្លួនបាននិយាយទៅកាន់កូនស្រីថា តែហ៊ានដើរលេងដឹងតែត្រូវហើយ (វាយហើយ) ហើយកូនស្រីខ្លួនបានតបថា ចាំមើលម៉ែឯង និយាយដោយសើច។ រួចកូនស្រីខ្លួនក៏បានដើរទៅផ្ទះយាយវា បានមួយសន្ទុះ ម៉ោង១៨នឹង៣០នាទី ក៏មានក្មេងបានរត់មកប្រាប់ខ្លួនថា កូនស្រីខ្លួនកំពុងក្អួត ខ្លួនក៏បានរត់ទៅមើលឃើញកូនស្រីក្អួតចេញមកពណ៌ខៀវ ហើយខ្លួនបានសួរកូនស្រីថា ឯងផឹកស្អី កូនស្រីបាននិយាយថា ផឹកថ្នាំបាញ់ស្មៅអស់មួយកែវ ហើយវាបាននិយាយថា មិនបាច់យកទៅពេទ្យទេ រួចខ្លួនក៏បានយកកូនស្រីទៅពេទ្យប៉ុន្តែគ្រូពេទ្យបាននិយាយថា ហួសពេលហើយថ្នាំពេទ្យបានចូលដល់ពោះវៀនហើយ រួចខ្លួនបានដឹកកូនស្រីមកផ្ទះវិញក៏បានស្លាប់តែម្តង ។
ដោយឃើញសភាពដូចនេះកម្លាំងផ្នែកជំនាញនៃអធិការដ្ឋាននគរបាលស្រុកកំរៀង បាន សហការជាមួយកម្លាំងប៉ុស្ដិ៍រដ្ឋបាល និងលោកមេភូមិ បង្កើតជាក្រុមគណៈកម្មការមួយដើម្បីត្រួតពិនិត្យ សាកសព ដោយទទួលបានលទ្ធផលៈ សាកសពស្ថិតនៅលើគ្រែក្នុងផ្ទះ ក្បាលទៅទិសខាងត្បូង ជើងសណ្តូកទៅទិសខាងជើង ដៃទាំងពីរដាក់លើទ្រូងប្រណំ គ្របភួយពណ៌ក្រហមលាយពណប្រផេះ, មិនមានស្លាក់ស្នាមអ្វីគួរឲ្យកត់សំគាល់ឡើយ។
ចំពោះករណីៈ នេះអាចវាយតម្លៃបានថា ជនរងគ្រោះពិតជាបានធ្វើអត្តឃាត(ផឹកថ្នាំបាញ់សម្លាប់ស្មៅ ) ពិតប្រាកដមែន។ ក្រោយពីពិនិត្យរួច បានប្រគល់សាកសពអោយទៅឈ្មោះសន ទូច ភេទស្រី អាយុ ៤១ឆ្នាំដែលត្រូវជាម្តាយបង្កើតយកធ្វើបុណ្យ តាមប្រពៃណី ៕ សំ វិច្ឆិកា
