សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរស២នាក់បានរងរបួសធ្ងន់ធ្ងរនិងត្រូវបានបងប្អូនប្រជាពលរដ្ឋបញ្ជូនទៅសង្គ្រោះបន្ទាន់ភ្លាមៗ បន្ទាប់ពីត្រូវរថយន្តRANGE ROVERបើកចេញពីរោងចក្របម្រុងបត់ស្តាំឡើងផ្លូវធំរួចប៉ះជាមួយមូ៉តូជនរងគ្រោះក្នុង ខណៈពេលដែលជនរងគ្រោះកំពុងជិះម៉ូតូម៉ាកហុងដាឌ្រីមសេ១២៥ មួយគ្រឿង កាលពីវេលាម៉ោង៣និង៥៥នាទីរសៀល ថ្ងៃអាទិត្យ ១១រោច ខែបឋមាសាឍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៨ ខែកក្កដា ឆ្នាំ២០១៨ នៅលើកំណាត់ផ្លូវអូរដឹមកប់ស្រូវ ត្រង់ចំណុចភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា ជនរងគ្រោះមិនទាន់ត្រូវបានស្គាល់ឈ្មោះនៅឡើយ ហើយនៅមុនពេលកើតហេតុពួកគាត់ទាំងពីរនាក់បានជិះម៉ូតូ១គ្រឿង ម៉ាកហុងដាឌ្រីមសេ១២៥ពណ៍ខ្មៅពាក់ស្លាកលេខភ្នំពេពេញ1AS-3074ធ្វើដំណើរក្នុងទិសដៅពីជើងទៅត្បូងក្នុងលក្ខណះបញ្រ្ចាសទិស។លុះពេលទៅដល់ត្រង់ចំណុចកើតហេតុក៏បានវាក់ជាមួយ រថយន្តRANGE ROVER ពណ៍ខ្មៅពសក់ស្លាកលេខភ្នំពេញ2T-3536 ដែលកំពុងបើកចេញពីក្នុងរោងចក្រមួយ ។ ខណៈនោះគេចចេញមិនទាន់ក៏បានបុកពេញទំហឹងបណ្ដាលឲ្យដួលបោកផ្ទប់ថ្នល់រងរបួសទាំង២នាក់តែម្ដង បន្ទាប់មកជនរងគ្រោះត្រូវបានគេបញ្ជូនទៅសង្គ្រោះបន្ទាន់ ហើយរថយន្តនិងម៉ូតូត្រូវនគរបាលនាំយកវាស់វែងយកទៅរក្សាទុករង់ចាំការដោះស្រាយគ្នានៅពេលក្រោយ ៕ សុខាសែនជ័យ
