សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ស្រវឹងស្រា បានបើករថយន្ដឡិចស៊ីស LX470 ទៅបុកនឹងក្បាលនាគពុះចែកទ្រូងផ្លូវ បណ្ដាលឲ្យបាក់អស់មួយកង់ ហើយមិនទាន់អស់ល្បឿន ក៏បន្ដទៅបុកខ្លោងទ្វារផ្ទះប្រជាពលរដ្ឋបន្ថែមទៀត បណ្ដាលឲ្យរងការខូចខាតយ៉ាងដំណំ ។
ហេតុការណ៍គ្រោះថ្នាក់ចរាចរណ៍នេះបានបង្កការភ្ញាក់ផ្អើលកាលពីវេលាម៉ោង២ និង៣០នាទីរំលងអធ្រាត្រ ឈានចូលថ្ងៃទី១៧ ខែវិច្ឆិកា ឆ្នាំ២០១៨ ស្ថិតតាមបណ្ដោយផ្លូវសហព័ន្ធរុស្ស៊ី ក្បែរក្ដាន់២ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុបានប្រាប់ឲ្យដឹងថា មុនពេលកើតហេតុគេឃើញរថយន្ដម៉ាកឡិចស៊ីស LX470 ពណ៌ខ្មៅ ពាក់ស្លាកលេខភ្នំពេញ2N-3923 ដែលបើកបរ ដោយបុរសម្នាក់ស្រវឹងស្រា បានធ្វើដំណើរទិសដៅពីកើតមកលិច ក្នុងល្បឿនលឿន ពេលមកដល់ចំណុចកើតហេតុ ក៏បានរេចង្កូតទៅបុកក្បាលនាគពុះចែកទ្រូងផ្លូវ បណ្ដាលឲ្យបាក់អស់មួយកង់ ខណះនោះរថយន្ដមិនទាន់អស់ល្បឿន ក៏បានបន្តដំណើរទៅបុកដើមឈើ និងបុកខ្លោងទ្វារផ្ទះប្រជាពលរដ្ឋបណ្ដាលឲ្យរងការខូចខាខ្លោងទ្វារពីរផ្ទះយ៉ាងដំណំ ចំណែកឯរថយន្ដវិញ ក៏រងការខូចខាតផ្នែកពីមុខយ៉ាងដំណំផងដែរ តែករណីនេះមិនមានអ្នករងរបួសឡើយ ។
ក្រោយពេលកើតហេតុមត្ថកិច្ចមូលដ្ឋានបានឃាត់តៃតុងរថយន្តបង្កទៅកាន់ប៉ុស្ដិ៍ស្រះចក និងទំនាក់ទំនងទៅសមត្ថកិច្ចជំនាញចុះមកវាស់វែងយករថយន្តបង្កទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រា យគ្នាទៅតាមផ្លូវច្បាប់ ៕ ភារ៉ា ដង្កោ
