សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានស្លាប់ភ្លាមៗ ខណៈដែលជួបករណីគ្រោះថ្នាក់ចរាចរណ៍ គួរឲ្យរន្ធត់បន្ទាប់ពីជិះម៉ូតូទំនងស្រវឹងស្រា ប្រើប្រាស់ល្បឿនលឿន មិនប្រយត្ន័បុកបារ៉ាស់ការដ្ឋាន ហើយបានជ្រុលចង្កូតទៅបុករ៉ូឡូ ដែលបញ្ឈរនៅលើផ្លូវអែបខាងស្របគ្នាយ៉ាងពេញទំហឹងបង្កការភ្ញាក់ផ្អើលតែម្ដង ។
ហេតុការណ៍គួរឲ្យរន្ធត់នេះ បានកើតឡើងកាលពីនៅថ្ងៃទី២០ ខែមករា ឆ្នាំ២០១៩ វេលាម៉ោង១១ និង៣០នាទីយប់ ស្ថិតនៅភូមិអំពៅព្រៃ ឃុំធ្លក ស្រុកស្វាយជ្រំខេត្តស្វាយរៀង ។
យោងតាមសមត្ថកិច្ចនគរបាលស្រុកស្វាយជ្រំបានឲ្យដឹងថា បុរស ដែលស្លាប់មាន ឈ្មោះ សួន វាសនា អាយុ28ឆ្នាំ មុខរបរកសិករ រស់នៅភូមិសាលារៀន ឃុំបាសាក់ ស្រុកស្វាយជ្រំ ខេត្តស្វាយរៀង ខណៈជិះម៉ូតូម៉ាកស្មាក់វី ស៊េរី 2012 ពណ៌ខ្មៅ ស្លាកលេខ ស្វាយរៀង 1D.9693 ខូចខាតយ៉ាងដំណំ ។
ប្រភពពីសមត្ថកិច្ចនគរបាលស្រុកបញ្ជាក់ទៀតថា មុនកើតហេតុ មានបុរសម្នាក់បានជិះម៉ូតូ មួយគ្រឿង ម៉ាកស៊ុយសូគីស្មាស់ រីវូ ពណ៌ខ្មៅ លើកំណាត់ផ្លូវជាតិលេខ៣១៥ក្នុងទិសដៅពីជើងមកត្បូងក្នុងល្បឿនលឿន ទំនងស្រវឹងស្រា ស្រាប់តែទៅបុកបារ៉ាស់ការដ្ឋាន ហើយបានជ្រុលចង្កូត ទៅបុករ៉ូឡូ ដែលបញ្ឈរនៅលើផ្លូវអែបខាងស្របគ្នាយ៉ាងពេញទំហឹង បង្កការភ្ញាក់ផ្អើលដល់អ្នកភូមិតែម្ដង ។
រីឯមធ្យាបាយទាំងពីរគ្រឿង ត្រូវបានសមត្ថកិច្ច វាស់វែងបញ្ជូនទៅអធិការដ្ឋាននគរបាល ស្រុកស្វាយជ្រំ ដើម្បីដោះស្រាយតាមច្បាប់ ។
រីឯសាកសពត្រូវបានប្រគល់ ឲ្យក្រុមគ្រួសារសាច់ញាតិយកទៅធ្វើបុណ្យតាមប្រពៃណី ៕ យឹម សុថាន
