សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ ស្រ្តីម្នាក់ជិះម៉ូតូឆ្លងថ្នល់ខ្វះការប្រុងប្រយ័ត្នត្រូវរថយន្ត ហៃឡេនឌ័រ បុកពេញទំហឹងបណ្តាលឲ្យស្លាប់ភ្លាមៗនៅនឹងកន្លែងកើតហេតុ ។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង ១៩និង៤៥នាទី ថ្ងៃ៨ ខែកុម្ភ: ឆ្នាំ២០១៩ នៅតាមបណ្តោយផ្លូវជាតិលេខ៦ ចំណុចផ្លូវប្រសព្វសញ្ញាលេខបូក ស្ថិតនៅភូមិព្រៃតាហ៊ូ. សង្កាត់ព្រៃតាហ៊ូ ក្រុងស្ទឹងសែន ខេត្តកំពង់ធំ។
សមត្ថកិច្ចឲ្យដឹងថា សាកសពស្ត្រីរងគ្រោះមានឈ្មោះ សុខ សុផល អាយុ ៤០ឆ្នាំ មានទីលំនៅ ភូមិ/សង្កាត់កើតហេតុខាងលើ។ ចំណែកតៃកុងរថយន្ត ចុះរត់គេចខ្លួនបាត់ស្រមោល បន្សល់ទុករថយន្តនៅកន្លែងកើតហេតុ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា៖ មុនពេលកើតហេតុ ឃើញអ្នកបើករថយន្ត ហៃឡេនឌ័រ ពណ៌ស ចេញពីជើងទៅត្បូងក្នុងល្បឿនលឿន ហើយគេឃើញស្រ្តីម្នាក់ជិះម៉ូតូ ឌ្រីមសង់ C 125 ពណ៌ខ្មៅ ស្លាកលេខ កំពង់ធំ 1K 3177 បម្រុងឆ្លងថ្នល់ ទិសដៅពីលិចទៅកើត ។
សាក្សីបន្តទៀតថា លុះដល់កន្លែងកើតហេតុ ស្រ្តីរងគ្រោះជិះម៉ូតូឆ្លងមិនមើលឆ្វេងស្តាំ ឆ្លងវឹង គួបផ្សំអ្នកបើកបររថយន្តមានល្បឿនលឿន ក៏បុកពេញទំហឹងបណ្តាលឲ្យស្រ្តីរងគ្រោះស្លាប់ភ្លាមៗ យ៉ាងអាណោចអាធ័មនៅកន្លែងកើតហេតុ ចំណែកតៃកុងររថយន្ត ដាក់មេប្រូចបាត់ស្រមោល។
វត្ថុតាងរថយន្ត និងម៉ូតូយកទៅរក្សារទុកនៅអធិការដ្ឋាននគរបាលក្រុងស្ទឹងសែន ដើម្បីរង់ចាំដោះស្រាយនាពេលក្រោយ ចំណែកសាកសពស្រ្តីរងគ្រោះសាច់ញាតិយកទៅធ្វើបុណ្យទៅតាមប្រពៃណី ៕ ប៊ុនរិទ្ធី
