ឃាត់ខ្លួនបានម្នាក់ ក្នុងចំណោមជនសង្ស័យមានគ្នា២នាក់ ក្រោយពីធ្វើសកម្មភាពឆក់ទូរស័ព្ទដៃពីជនរងគ្រោះ

ភ្នំពេញ៖ កម្លាំងប៉ុស្តិ៍នគរបាលរដ្ឋបាលផ្សារកណ្តាលទី១ នៃអធិការដ្ឋាននគរបាលខណ្ឌដូនពេញបានឃាត់ខ្លួនជនសង្ស័យម្នាក់ក្នុងចំណោមបក្ខពួក២នាក់ក្រោយជិះម៉ូតូឆក់ទូរស័ព្ទដៃកាលពីវេលាម៉ោង១០ថ្ងៃសៅរ៍៨រោច ខែចេត្រ ឆ្នាំកុរ ឯកស័ក ព.ស ២៥៦២ ត្រូវនឹងថ្ងៃទី២៧ ខែមេសា ឆ្នាំ២០១៩ នៅចំណុចលើផ្លូវព្រះស៊ីសុវត្ថិកែងផ្លូវ១៤៨ ភូមិទី៦ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ ។

ជនសង្ស័យត្រូវឃាត់ខ្លួនឈ្មោះ កែវ វិចិត្រ ភេទប្រុស អាយុ២០ ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅផ្ទះជួល ផ្លូវ៥៩៨ ភូមិទួលពពែ សង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ ។ ចំណែកបក្ខពួកម្នាក់ទៀត កំពុងរត់គេចខ្លួន ។

វត្ថុតាងចាប់យកបានមាន ម៉ូតូចំនូន០១គ្រឿងម៉ាក SuzukiSmashV ស្មាស់វី ពណ៌ខ្មៅ ពាក់ស្លាកលេខ ភ្នំពេញ 1AR-5486 ដែលជារបស់ជនសង្ស័យជិះធ្វើសកម្មភាព ។

សម្ភារដែលបាត់បង់រួមមានទូរស័ព្ទដៃ១គ្រឿង ម៉ាកSamsungJ7 ពណ៌ខ្មៅ (ត្រូវបានជនសង្ស័យជាបក្ខពួកយករត់គេចខ្លួនបាត់) ។

បច្ចុប្បន្ន ជនសង្ស័យត្រូវកម្លាំងសមត្ថកិច្ចប៉ុស្តិ៍ផ្សារកណ្ដាលទី១ សហការជាមួយ កម្លាំងអធិការដ្ឋានខណ្ឌដូនពេញកសាងសំណុំរឿងតាមនីតិវិធី ៕ ធឿនព្រែកជ័យ