រថយន្តកាមេរីបាឡែនបុករះឡាន១គ្រឿង និងម៉ូតូ៣គ្រឿងទាំងព្រឹកនៅខណ្ឌមានជ័យ សំណាងគ្មានអ្នករងរបួស 

ភ្នំពេញ ៖ បុរសជនជាតិចិនម្នាក់បានបើករថយន្តកាមេរីបាឡែន បុករះរថយន្ត១គ្រឿង និងម៉ូតូ៣គ្រឿងបង្កការភ្ញាក់ផ្អើលទាំងព្រឹកព្រលឹម តែសំណាងល្អគ្មានអ្នករងរបួស ។ ហេតុការណ៍នេះបានកើតឡើងនៅវេលាម៉ោង៧ព្រឹកថ្ងៃទី៩ ខែវិច្ឆិកា ឆ្នាំ២០១៩ តាមបណ្តោយផ្លូវវេងស្រេង ខាងលិចសួនឧហ្សាហកម្មវឌ្ឍនះ ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ ។

ប្រភពព័ត៌មានពីកន្លែងកើតហេតុបានឱ្យដឹងថា នៅវេលាម៉ោងកើតហេតុគេបានឃើញបុរសម្នាក់ដែលគេស្គាល់ថាជាជនជាតិចិន បានបើករថយន្តកាមេរីបាឡែន ពណ៌ស្ករ ពាក់ស្លាកលេខ ភ្នំពេញ 2V-3402 ចេញពីផ្ទះរបស់ខ្លួនលក់គ្រឿងសំណង់យីហោ ម៉េង ហេង ហើយទំនងជាជាន់ហ្គាច្រលំថាជាហ្វ្រាំង ក៏បានជ្រុលបុករះរថយន្តSUZUKIមួយគ្រឿងចំពីជំហៀងពេញទំហឹង និងម៉ូតូ៣គ្រឿងទៀត បណ្តាលអោយរងការខូចខាតយ៉ាងដំណំ តែសំណាងល្អមិនមានអ្នករងរបួសនោះទេ ។

ក្រោយកើតហេតុក្រុមគ្រួសារជនបង្កបានធ្វើការសម្របសម្រួលជាមួយម្ចាស់រថយន្ត និងយាន្តយន្តរងគ្រោះ ដោយព្រោះទទួលខុសនិងចេញសងនូវថ្លៃខូចខាត ដើម្បីបញ្ចប់រឿងមិនអោយរំខានសមត្ថកិច្ច ៕ ភារ៉ា ដង្កោ