សារព័ត៌មាន នគរវត្ត តែងតែនាំមុខគេជានិច្ច
ក្រោយពេលកម្លាំងទាហានតួកគីវាយប្រហារ ទៅលើក្រុមជនជាតិឃឺដនៅប្រទេសស៊ីរី ជាក្រុមដែលរដ្ឋាភិបាលតួកគីចាត់ទុកថា ជាក្រុមភេរវកម្ម ក្រោយក្រុមនេះចូលរួមធ្វើរដ្ឋប្រហារនៅតួកគីមិនបានសម្រេចនាពេលកន្លងមក។
ពេលនេះ ប្រធានាធិបតីតួកគី លោក Recep Tayyip កាលពីថ្ងៃទី២៥ ខែតុលា បានជំរុញឲ្យអាមេរិក ប្រគល់មេបញ្ជាការកងកម្លាំងដឹកនាំដោយជនជាតិឃឺដមកឲ្យខ្លួន ខណៈរដ្ឋាភិបាលទីក្រុងអង់ការ៉ា តែងតែចោទប្រកាន់ដល់កងកម្លាំងនេះជាក្រុមភេរវករ។
ចំណងមិត្តភាព រវាងអាមេរិក និង តួកគី បានឈានដល់ដំណាក់កាលតានតឹងដាក់គ្នា ក្រោយពេលអាមេរិក បានគាំទ្រអស់រយៈពេលជាច្រើនឆ្នាំទៅលើកងកម្លាំងឃឺដ នៅក្នុងប្រទេសស៊ីរី ហើយក្រុមនេះត្រូវបានតួកគីចាត់ទុកជាក្រុមភេរវករ។
តួកគីនៅតែចាត់ទុកកងកម្លាំងប្រជាធិបតេយ្យស៊ីរី (SDF) ប្រយុទ្ធប្រឆាំងនឹងក្រុមជ្រុលនិយម ISIS ដែលគាំទ្រដោយការវាយប្រហារតាមអាកាសរបស់អាមេរិក ថាជាយុទ្ធជនឃឺដ ចេញពីក្រុម YPG ហើយលោក Mazlum Abdi ជាមេដឹកនាំ នៃ SDF នេះ។
លោកប្រធានាធិបតីតួកគី បានប្រាប់បណ្ដាញផ្សព្វផ្សាយរបស់រដ្ឋ TRT ថា ឈ្មោះ Mazlum នេះ គឺជាភេរវករ ដែលបានស្វែងរក នៅក្នុងបញ្ជីក្រហម ត្រូវបានស្រាវជ្រាវ ដោយប៉ូលិសអន្ដរជាតិ។ ដូច្នេះអាមេរិកត្រូវតែប្រគល់បុរសនេះ មកឲ្យតួកគី។
សមាជិកព្រឹទ្ធសភាមួយក្រុម រួមទាំងលោកស្រី Lindsey Graham នៅសប្តាហ៍នេះ បានទទូចដល់ក្រសួងការបរទេសអាមេរិក ឱ្យផ្តល់ទិដ្ឋាការជូនលោក Abdi ឲ្យបានលឿន ដើម្បីលោកអាចនិយាយទៅកាន់មន្រ្តីអាមេរិក ស្តីអំពីស្ថានភាពដែលកំពុងកើតឡើង នៅក្នុងប្រទេសស៊ីរី។
ប្រធានាធិបតីអាមេរិក ដូណាល់ ត្រាំ បានសរសេរ នៅលើបណ្ដាញសង្គម Twitter កាលពីថ្ងៃព្រហស្បតិ៍ ទី២៤ ខែតុលា ថា លោកបានជជែកជាមួយលោកអា Abdi ហើយ ដោយលោកពិតជារីករាយ ក្នុងការសន្ទនានេះ។ ជាមួយគ្នានេះ គាត់ក៏បានកោតសរសើរចំពោះអ្វីដែលយើងបានធ្វើ ហើយខ្ញុំពេញចិត្តចំពោះអ្វីដែលជនជាតិឃឺដបានធ្វើ» ដែរ។
ទោះជាយ៉ាងណា ប្រធានាធិបតីតួកគី នៅតែអំពាវនាឲ្យអាមេរិក ប្រគល់មេដឹកនាំ SDF មកឲ្យខ្លួន ក៏ដូចជាទាមទារឲ្យកងកម្លាំងឃឺដ ដកចេញឲ្យឆ្ងាយពីព្រំដែនរបស់ខ្លួន។ ក្រៅពីនេះ តួកគី បានចោទប្រកាន់ដល់កងកម្លាំងឃឺង បានរំលោភលើបទឈប់បាញ់គ្នា នៅភាគឦសាន នៃប្រទេសស៊ីរី ថែមទៀតផង។ ទន្ទឹមនឹងនេះ កងទ័ពរបស់តួកគី ក៏បានល្បាត នៅភាគខាងជើទីក្រុង Tal Abyad ជាតំបន់របស់នៅរបស់ឃឺដ ក្នុងទឹកដីស៊ីរី ផងដែរ។
ដោយឡែក ប្រេសិតពិសេសរបស់លោកប្រធានានាធិបតីអាមេរិក ដូណាល់ ត្រាំ ទទួលបន្ទុក នៅក្នុងប្រទេសស៊ីរី លោក James Jeffrey បានថ្លែងថា លោកបានទាមទារឲ្យមានការពន្យល់ពីរដ្ឋាភិបាលទីក្រុងអង់ការ៉ា ជុំវិញការលើកកងទ័ព ឆ្លងព្រំដែនរបស់ខ្លួន ចូលលុកលុយ នៅភាគខាងជើង នៃប្រទេសស៊ីរី។
ប្រេសិតអាមេរិករូបនេះ បានបញ្ជាក់ទៀតថា ការលុកលុយចូលទៅក្នុងប្រទេសស៊ីរីបែបនេះ អាចចាត់ទុកថា តួកគីកំពុងតែប្រព្រឹត្ដនូវឧក្រិដ្ឋកម្មសង្រ្គាម។ ជាមួយគ្នានេះដែរ លោកក៏មានការព្រួយបារម្ភយ៉ាងខ្លាំងទៅលើកងកម្លាំងប្រឆាំងនឹងរបបគ្រប់គ្រងនៅប្រទេសស៊ីរីរបស់លោកបាសា អាល់អាសាដ ដែលគាំទ្រដោយកងកម្លាំងតួកគី។ នៅក្នុងការលុកលុយដោយកងទ័ពរបស់ប្រទេសតួកគីនោះ បានធ្វើឲ្យប្រជាពលរដ្ឋជាច្រើន បានរត់ភៀសខ្លួន ដោយសារពួកគេព្រួយបារម្ភយ៉ាងខ្លាំង អំពីកងកម្លាំងប្រឆាំងស៊ីរី ដែលគាំទ្រដោយតួកគី។
បច្ចុប្បន្ន លោកពូទីន និងលោកអ៊ែរដូហ្កាន់ ប្រធានាធិបតីតួកគី បានយល់ព្រមគ្នា ក្នុងការផ្អាកការប្រយុទ្ធ ព្រមទាំងយល់ព្រមសហការគ្នា គ្រប់គ្រងតំបន់ព្រំដែនភាគខាងជើងស៊ីរី ដែលពីមុន ធ្លាប់ជាតំបន់កាន់កាប់ របស់ក្រុមប្រដាប់អាវុធគួក។
កាលពីថ្ងៃទី៩ តុលា តួកគីបានបញ្ជូនទ័ព ចូលទៅក្នុងទឹកដីស៊ីរី ត្រង់តំបន់ភាគខាងជើងជាប់ព្រំដែនខ្លួន ដែលតំបន់ទាំងនោះ ស្ថិតក្នុងការកាន់កាប់ របស់កងកម្លាំងប្រដាប់អាវុធគួក។ ប្រតិបត្តិការ ដែលតួកគីចាត់ទុកថាជាការកំទេចក្រុមភេរវកម្មនេះ បានបណ្តាលឲ្យស្លាប់ប្រជាជនស៊ីវីលគួកជាច្រើននាក់ និងមនុស្សជាច្រើនម៉ឺននាក់ ត្រូវបង្ខំចិត្ត ភៀសខ្លួនចាកចោលផ្ទះសម្បែង។
នៅថ្ងៃទី១៧តុលា ដោយមានអន្តរាគមន៍ពីសហរដ្ឋអាមេរិក តួកគីបានសុខចិត្តចុះកិច្ចព្រមព្រៀងផ្អាកការប្រយុទ្ធរយៈពេល៥ថ្ងៃ ដែលបានផុតកាលពីម៉ោង៧ល្ងាច ថ្ងៃអង្គារទី២២តុលា។ រដ្ឋមន្ត្រីក្រសួងការពារជាតិតួកគី បានបញ្ជាក់ថា សម្រាប់តំណាក់កាលនេះ គឺតួកគី គ្មានគំរោងបើកប្រតិបត្តិការយោធាថ្មីណាមួយផ្សេងទៀតទេ ព្រោះក្រុមប្រដាប់អាវុធគួក បានដកថយចេញពីតំបន់ព្រំដែនភាគខាងជើងស៊ីរីហើយ។
ព្រមជាមួយពេលនេះដែរ រុស្ស៊ីបានចូលខ្លួន ធ្វើអន្តរាគមន៍ក្នុងបញ្ហានេះ ដោយបានរៀបចំការប្រជុំបន្ទាន់មួយ នៅទីក្រុងសុតឈីល រវាងលោកពូទីន និងលោកអ៊ែរដូហ្កាន់។ ឆ្លងកាត់ការប្រជុំរយៈពេល៦ម៉ោង ភាគីទាំងពីរ បានយល់ព្រមសហការគ្នា គ្រប់គ្រងតំបន់ភាគខាងជើងស៊ីរី។ ក្នុងន័យនេះ តំបន់ភាគខាងជើងស៊ីរី ដែលជាប់ព្រំដែនតួកគី មួយភាគធំ ប្រវែងជាង៤០០គីឡូម៉ែត្រ គឺត្រូវស្ថិតក្នុងការគ្រប់គ្រងរបស់កងទ័ពរុស្ស៊ី និងកងទ័ពតួកគី។ ក្នុងនោះ ដែនដីស៊ីរី នៅតាមបណ្តោយព្រំដែន ប្រមាណជា១២០គីឡូម៉ែត្រ នឹងត្រូវស្ថិតក្នុងការគ្រប់គ្រងដោយផ្ទាល់ របស់តួកគី។
នៅក្នុងសន្និសីតកាសែត ក្រោយកិច្ចប្រជុំ លោកអ៊ែរដូហ្កាន់ បានប្រកាសថា កិច្ចព្រមព្រៀងរវាងលោក និងលោកពូទីននេះ គឺជាកិច្ចព្រមព្រៀងជាប្រវត្តិសាស្ត្រ ដើម្បីរក្សាសុវត្ថិភាពនៅតាមព្រំដែនរវាងតួកគី និងស៊ីរី។ ចំណែកលោកពូទីនវិញ បានគូសបញ្ជាក់ អំពីភាពចាំបាច់ ក្នុងការទប់ស្កាត់ កុំឲ្យក្រុមជីហាតអង្គការរដ្ឋអ៊ីស្លាម ឆក់ឱកាសប្រមូលកម្លាំងធ្វើសកម្មភាពឡើងវិញឲ្យសោះ។
ដោយឡែក លោកបាឆា អាល់អាសាដ ប្រធានាធិបតីស៊ីរី បានទូរស័ព្ទទៅនិយាយជាមួយលោកពូទីន ដោយបានលើកឡើងថា ស៊ីរីនឹងមិនអនុញ្ញាតឲ្យមានការចូលទន្ទ្រានពីសំណាក់កងទ័ពបរទេសណាមួយទេ។ មិនត្រឹមតែប៉ុណ្ណោះ លោកបាឆា អាល់អាសាដ បានអះអាងទៀតថា មិនយូរមិនឆាប់ កងទ័ពជាតិស៊ីរី និងគ្រប់គ្រងបូរណភាពដែនដីស៊ីរី ទាំងស្រុងឡើងវិញ៕
