សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ សមត្ថកិច្ចនគរបាលប៉ុស្តិ៍រដ្ឋបាលបាវិត បានឃាត់ខ្លួនបុរសសង្ស័យ ជាជនជាតិវៀតណាមម្នាក់ ពាក់ពន្ធ័ករណីធ្វើសកម្មភាពលួចកាច់កម៉ូតូ តែមិនបានសម្រេច ។
ការឃាត់ខ្លួននេះ បានធ្វើឡើងកាលពីវេលា ម៉ោង៨និង៣០នាទីយប់ នៅថ្ងៃទី១៤ ខែវិច្ឆិកា ឆ្នាំ២០១៩ នៅបន្ទប់ផ្ទះជួលស្ថិត ក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង ។
បើតាមសមត្ថកិច្ចនគរបាល ក្រុងបាវិតបានឲ្យដឹងថា ជនសង្ស័យដែលជាជនជាតិវៀតណាម មិនត្រូវបានស្គាល់ឈ្មោះ និងទីលំនៅ ដោយសមត្ថកិច្ចសួរនាំ មិននិយាយស្ដីធ្វើដូចជាមនុស្សវង្វេងវង្វាន់ ។
ចំណែកម៉ូតូកាច់ក ម៉ាកហុងដា សេ ១២៥ ពណ៌ខ្មៅ ស្លាកលេខ កណ្ដាល ១A-៨៧៨៥ កម្មសិទ្ធិរបស់ឈ្មោះ សុខ វិរៈ ភេទ ប្រុស អាយុ២៧ឆ្នាំ ជនជាតិខ្មែរ មុខរបរបុគ្គលិកកាស៊ីណូ មានទីលំនៅភូមិអូតាគាំ១ ឃុំទួលតាឯក ស្រុកបាត់ដំបង ខេត្តបាត់ដំបង ។
រីឯម្ចាស់ផ្ទះឈ្មោះ យូ យន់ ភេទប្រុស អាយុ៦៥ឆ្នាំ ស្ថិតក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង ។
បច្ចុប្បន្នជនសង្ស័យ ឃាត់ខ្លួននៅប៉ុស្តិ៍នគរបាលរដ្ឋបាលបាវិត ដើម្បីបំពេញសំណុំរឿង ចាត់ការតាមច្បាប់ ៕ យឹម សុថាន
