បុរសបីនាក់បើកម៉ូតូដឹកគ្នាជ្រុលទៅបុករថយន្តបើកឆ្លងផ្លូវរបួសធ្ងន់៣នាក់

ភ្នំពេញ៖ បុរសបីនាក់ជិះម៉ូតូធំលឿនជ្រុលបុករថយន្តបើកឆ្លងផ្លូវពេញទំហឹងបណ្ដាលឲ្យរងរបួសធ្ងន់ស្រាលទាំងអស់គ្នា ត្រូវបញ្ជូនទៅមន្ទីរពេទ្យភ្លាមៗចំណែករថយន្តបើកគេចបាត់ស្រមោល ។

ហេតុការណ៍នេះបានកើតឡើងកាលពីម៉ោង១២រំលងអធ្រាត្រ ឈានចូលថ្ងៃ ៦ ខែធ្នូ ឆ្នាំ ២០១៩ ស្ថិតនៅតាមបណ្ដោយផ្លូវភ្នំពេញ ហាណូយ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេឃើញបុរស៣នាក់បើកម៉ូតូធំដឹកគ្នាម៉ាកYAMAHA FZ ពណ៌ខ្មៅ លាយក្រហម ពាក់ស្លាកលេខ ភ្នំពេញ 1CG-6886 ធ្វើដំណើរតាមបណ្ដោយផ្លូវភ្នំពេញ ហាណូយក្នុង ទិសដៅពីជើងទៅត្បូង ខណៈមកដល់ចំណុចការ៉ាស់សាំងតេលាម៉ាត មានរថយន្តមួយគ្រឿងម៉ាកតូយ៉ូតា ហាយឡិនឌ័រពណ៌ស មិនចាំស្លាកលេខធ្វើដំណើរក្នុងទិសដៅពីលិចទៅកើតឆ្លងផ្លូវគាត់ត្រូវម៉ូតូបុកពេញទំហឹងបណ្ដាលឲ្យភាគីខាងម៉ូតូរងរបួសធ្ងន់ស្រាលបីនាក់បានប្រជាពលរដ្ឋទាក់ទងរថយន្តសង្គ្រោះបន្ទាន់ដឹកយកទៅមន្ទីរពេទ្យ ចំណែករថយន្តគេចខ្លួនបាត់ស្រម៉ោល ។

បន្ទាប់ពីកើតហេតុ សមត្ថកិច្ចចរាចរខណ្ឌសែនសុខ ចុះដល់កន្លែងកើតហេតុយកម៉ូតូរក្សាទុកបណ្ដោះអាសន្ននៅខណ្ឌរង់ចាំសាច់ញាតិយកត្រឡប់ទៅវិញ ៕ ជ្រោយពេជ្រ