សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ឆ្នាំ ២០១៩ មានសិល្បករក្មេងចាស់ដែលមានស្នាដៃ និងកេរឈ្មោះល្បីល្បាញជាច្រើនរូបបានទទួលមរណភាពដែលបន្សល់ទុកនូការសោកស្តាយជាខ្លាំងពីមហាជន។ សិល្បករទាំងនោះមានដូចជា ៖
១. អ្នកគ្រូ គង់ ណារី
ជាសិល្បករជើងចាស់ អ្នកគ្រូ គង់ ណារី គឺជាអតីតគ្រូបង្ហាត់សិល្បៈប្រចាំនៅក្នុងវិទ្យាល័យវត្តកោះ ដោយអ្នកគ្រូមានជំនាញបង្ហាញផ្នែករបាំ ពិធីករ ចម្រៀង និងកំណាព្យ ហើយបានបណ្ដុះតារាសិល្បៈជាច្រើនរូបឲ្យក្លាយជាតារាដែលមានកេរ្តិ៍ឈ្មោះបោះសំឡេង។ វិរៈសិល្បការិនីជើងចាស់ល្បីឈ្មោះ អ្នកគ្រូ គង់ ណារី បានទទួលមរណភាពយ៉ាងគួរឲ្យសោកស្ដាយបំផុត កាលពីរសៀលថ្ងៃទី២០ ខែមករា ឆ្នាំ២០១៩ បន្ទាប់ពីបានចូលសង្គ្រោះបន្ទាន់នៅក្នុងមន្ទីរពេទ្យព្រះកុសុមៈអស់ច្រើនថ្ងៃ ដោយជំងឺក្រិនថ្លើម និងទាចទឹក។
២. លោកសាស្ត្រាចារ្យ ផ្លុង មឿក
លោក ផ្លុង មឿក ព្រឹទ្ធាចារ្យចម្រៀងអាយ៉ៃ បានទទួលមរណភាពក្នុងជន្មាយុ ៨៦ឆ្នាំ កាលពី ថ្ងៃទី១៥ ខែកុម្ភៈ ឆ្នាំ២០១៩ ដោយជម្ងឺរោគាពាធ។ព្រឹទ្ធាចារ្យចម្រៀងអាយ៉ៃ លោកតា ផ្លុង មឿក ធ្លាក់ខ្លួនឈឺធ្ងន់ជាច្រើនឆ្នាំមកហើយ។ ឯភរិយារបស់លោកក៏បានទទួលមរណភាពកាលពីឆ្នាំ២០១៧ផងដែរ។
៣. តារាកំប្លែង ធូ ចំរ៉ុង ហៅនាយ សានម៉ៅ
តារាកំប្លែងល្បីឈ្មោះ នាយសានម៉ៅបានទទួលមរណភាពហើយកាលពី ថ្ងៃទី២ខែតុលាឆ្នាំ២០១៩ ក្នុងអាយុ៦០ឆ្នាំ ដោយសារតែស្ទះបំពង់ខ្យល់ ក៏គាំងបេះដូងស្លាប់នៅមន្ទីរពេទ្យខេត្តអ៊ូប៊ុន ប្រទេសថៃ។ មរណភាពរបស់លោកបានបន្សល់ទុកនូវក្តីអាឡោះអាល័ខ្លាំងសម្រាប់អ្នករួមអាជីពដ៏ដូចជាមហាជន។
៤.សម្តេចរាជបុត្រីព្រះរៀម នរោត្តម បុប្ផាទេវី
ឧត្តមប្រឹក្សាផ្ទាល់ព្រះមហាក្សត្រ និងជាសមាជិកាក្រុមប្រឹក្សាធម្មនុញ្ញសម្តេចរាជបុត្រីព្រះរៀម នរោត្តម បុប្ផាទេវី បានយាងសោយទីវង្គតក្នុងព្រះជន្មាយុ៧៦ព្រះវស្សា នៅមន្ទីរពេទ្យនៅទីក្រុងបាងកកប្រទេសថៃ ដោយរោគាពាធ។ ព្រះគុណូបការៈទាំងឡាយ ដែលសម្តេច បានលះបង់អស់ព្រះបញ្ញាញាណ និងកម្លាំងព្រះកាយពល ដើម្បីវប្បធម៌ជាតិ ជាពិសេសលើវិស័យសិល្បៈ។
៥.តារាកំប្លែង នាយស្មាញ
តារាកំប្លែងនាយ ស្មាញ បានទទួលមរណៈភាព ដោយការគ្រោះថ្នាក់ចរាចរណ៍ កាលពី ថ្ងៃសៅរិ៍ទី២៨ ខែធ្នូ ឆ្នាំ២០១៩ ត្រង់ចំណុចលើផ្លូវ៦០ម៉ែត្រ កែង៣០ម៉ែត្រ ភូមិទួលរការសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។សពតារាកំប្លែងល្បី វ័យ៦៨ឆ្នាំរូបនេះត្រូវបានតំកល់ធ្វើបុណ្យ នៅភូមិព្រែកហូរ ឃុំព្រែកហូរ ក្រុងតាខ្មៅ ខេត្តកណ្តាល ។ សម្ដេចតេជោ ហ៊ុន សែន នាយករដ្ឋមន្រ្តី បានសម្តែងការសោកស្ដាយ មរណៈភាពរបស់តារាកំប្លែងរូបនេះផងដែរ។
៦.លោក ស៊ិន សេដ្ឋកុល
លោក ស៊ិន សេដ្ឋកុល ត្រូវជាកូនបង្កើតលោក ស៊ិន ច័ន្ទឆាយ៉ា និងជាចៅបង្កើតអធិរាជសំឡេងមាស ស៊ិន ស៊ីសាមុត បានទទួលមរណភាពកាលពីថ្ងៃទី៣០ ខែធ្នូ ឆ្នាំ២០១៩ ដោយសារជំងឺ ដាច់សរសៃឈាមខួរក្បាល ក្នុងជន្មាយុ ៣៨ឆ្នាំ ។ មរណភាពរបស់លោកបានបន្សល់ទុកនូវការសោកស្តាយ និងអាណិតខ្លាំងក្រោយពីដឹងថាភរិយាលោកទើបនឹងសម្រាលបានបុត្រម្នាក់មានវ័យទើបជាង១ខែ៕ វឌ្ឍនា
