សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ កម្លាំងនគរបាលប៉ុស្តិ៍ស្រះចក បានចាប់ខ្លួនជនសង្ស័យម្នាក់ ដែលជាចោរជំនាញ គាស់ទ្វារផ្ទះពលរដ្ឋលួចយកទ្រព្យសម្បត្តិយ៉ាងសកម្មប្រចាំភូមិ កាលពីវេលាម៉ោង៥និង៣០នាទីល្ងាច ថ្ងៃទី១៣ ខែកុម្ភៈ ឆ្នាំ២០២០ នៅចំណុចផ្ទះលេខ២សេអឺ០ ផ្លូវលេខ៤៧ ភូមិ១២ សង្កាត់ស្រះចក ខណ្ឌដូនពេញ រាជធានីភ្នំពេញ ។
ជនសង្ស័យ ដែលត្រូវឃាត់ខ្លួននេះ មានឈ្មោះ យូ សុជាតី ហៅតី ភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅផ្ទះលេខ២សេអឺ០ ផ្លូវលេខ៤៧ ភូមិ១២ សង្កាត់ស្រះចក ខណ្ឌដូនពេញរាជធានីភ្នំពេញ ។ ចំណែកជនរងគ្រោះ ឈ្មោះ គីម វណ្ណា ភេទស្រី អាយុ៤៦ឆ្នាំ ជនជាតិវៀតណាម មុខរបរលក់កាហ្វេ ស្នាក់នៅផ្ទះលេខ៩៩អឺ០ ផ្លូវលេខ៩០ ភូមិ១១ សង្កាត់ស្រះចក ខណ្ឌដូនពេញ រាជធានីភ្នំពេញ ។ សម្ភារៈបាត់បង់មានប្រាក់រៀលចំនួនមួយលានម្ភៃម៉ឺនរៀល បារីម៉ាកម៉ៃសេវេន ចំនួន៣២កញ្ចប់, ដុំសាកថ្មទូរសព្ទដៃមួយ ។
តាមប្រភពព័ត៍មានពីមន្រ្តីនគរបាលប៉ុស្តិ៍ស្រះចក បានឲ្យដឹងថា មុនពេលឃាត់ខ្លួនជនសង្ស័យ គឺយោងតាមពាក្យបណ្ដឹងជនរងគ្រោះ បានប្តឹងឲ្យសមត្ថកិច្ចជួយធ្វើអន្តរាគមន៍តាមចាប់ជនសង្ស័យខាងលើ ក្រោយធ្វើសកម្មភាពគាស់ទ្វារផ្ទះរបស់គាត់លួចយកទ្រព្យសម្បត្តិមួយចំនួនបានសម្រេចហើយគេចខ្លួនបាត់ កាលពីវេលាម៉ោង៥ទៀបភ្លឺ ថ្ងៃទី១៣ ខែកុម្ភៈ ឆ្នាំ២០២០ ត្រង់ចំណុចផ្ទះលេខ១៣អឺ០ ផ្លូវលេខ៩០ ភូមិ១១ សង្កាត់ស្រះចក ខណ្ឌដូនពេញរាជធានីភ្នំពេញ ។
ក្រោយឃាត់ខ្លួន ចំពោះមុខកម្លាំងជំនាញខណ្ឌ និងប៉ុស្តិ៍ កំពុងបន្តការស្រាវជ្រាវរកបក្ខពួក និងកសាងសំណុំរឿងដើម្បីបញ្ជូនទៅសាលាដំបូងរាជធានីភ្នំពេញអនុវត្តតាមនីតិវិធី ៕ ស រស្មី
