🐨ខ្លាឃ្មុំ កូឡា ដែលរងរបួសដោយភ្លើងឆេះព្រៃ នៅអូស្ត្រាលី ត្រូវបានដោះលែងឲ្យចូលព្រៃធម្មជាតិវិញហើយ

សត្វខ្លាឃ្មុំ កូឡា(Koalas)ប៉ុន្មានក្បាល ដែលគួឲ្យស្រឡាញ់ បានរងគ្រោះដោយភ្លើងឆេះព្រៃជាប្រវត្តិសាស្ត្រក្នុងប្រទេសអូស្ត្រាលី កាលពីឆ្នាំ២០១៩ ពេលនេះបានដោះលែងឲ្យចូលទៅក្នុងព្រៃធម្មជាតិរបស់វាវិញហើយ។
សត្វខ្លាឃ្មុំ កូឡា ដែលរងរបួសដោយភ្លើងឆេះព្រៃត្រូវបានបញ្ជូនទៅកាន់មន្ទីរពេទ្យ Port Macquarie Koala ស្ថិតនៅស្រុក Port Macquarie រដ្ឋ New South Wales ដែលជាមន្ទីរពេទ្យតែមួយគត់ព្យាបាល ខ្លាឃ្មុំ កូឡា។
ក្នុងចំណោមខ្លាឃ្មុំកូឡា ដែលទទួលបានការចាប់អារម្មបំផុតនៅលើពិភពលោកនោះ មានឈ្មោះ Anwen ដែលរងរបួសពេញខ្លួនពេលភ្លើងឆេះព្រៃ។ Anwenជាខ្លាឃ្មុំញី១ក្បាលក្នុងចំណោម២៦ក្បាល ដែលបាន ដែលត្រូវ ដោះលែងចូលទៅក្នុងព្រៃធម្មជាតិរបស់វា ក្រោយរស់នៅក្នុងសួនអភិវក្សជាច្រើន ខែ ដើម្បីព្យាបាល។
នៅតំបន់ព្រៃភាគខាងជើងរដ្ឋ NSW ជាកន្លែងរស់នៅច្រើនជាងគេបំផុតនៃសត្វខ្លាឃ្មុំកូឡា មានប្រមាណ២៨ពាន់ក្បាល ក្នុងនោះមានប្រមាណ៨៤០០ក្បាលងាយដោយភ្លើងឆេះព្រៃ។ គ្រាន់តែនៅក្នុងរដ្ឋនេះមានព្រៃឈើជាង ៣,៤លានហិតារងការបំផ្លាញដោយភ្លើងឆេះ។
តាមគេហទំព័រ News.com.au ភ្លើងឆេះព្រៃកាលពីឆ្នាំ២០១៩ បានបំផ្លាញព្រៃឈើដល់ទៅ១០លានហិតា នៅទូទំាងប្រទេសនេះ ។ ព្រៃឈើជាជម្រកសត្វព្រៃយ៉ាងសំខាន់បំផុត ហើយភ្លើងឆេះព្រៃនោះបានសម្លាប់សត្វព្រៃដល់ទៅជាង១,២៥ពាន់លានក្បាល ក្នុងនោះមានសត្វតំណាងប្រទេស អូស្ត្រាលី កង់ហ្គារ៉ូ និង ខ្លាឃ្មុំ កូឡា ៕