សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោក ផន រឹម អ្នកនាំពាក្យក្រសួងសាធារណការ និង ដឹកជញ្ជូន នៅយប់ថ្ងៃទី២៣ ខែសីហា ឆ្នាំ២០២៤ បានបញ្ជាក់ថា ៖ មួយរយៈចុងក្រោយនេះ មានការផ្សព្វផ្សាយដោយបំពុល បំភាន់ ធ្វើឲ្យមានយល់ច្រឡំដែលមានចរិតនយោបាយដ៏ខ្មៅកខ្វក់ ដោយប្រើសកម្មភាពអុជអាល ចាក់រុក បំផុសបំផុល ពាក់ព័ន្ធគម្រោងផ្លូវនាវាចរ”ព្រែកជីកហ្វូណនតេជោ”។
លោក ផន រឹម អ្នកនាំពាក្យក្រសួងសាធារណការ និង ដឹកជញ្ជូន បានលើកឡើងថា ៖ ខ្ញុំសូមបញ្ជាក់ជូនសាធារណជនមេត្តាជ្រាបថា “រូបភាពវីដេអូខ្លីអមដោយការអត្ថាធិប្បាយ ដែលផុសផ្សាយដោយស្ត្រីក្នុងFacebook ឈ្មោះ Roeun Sin មិនមែនជាគម្រោងព្រែកជីកហ្វូណនតេជោនោះទេ”។
រាជរដ្ឋាភិបាលមានស្មារតីទទួលខុសត្រូវខ្ពស់ ហើយតម្កល់ស្មារតីនៃឯករាជ្យភាព អធិបតេយ្យភាព និងកិច្ចសហប្រតិបត្តិការជាមូលដ្ឋានគ្រឹះនៃការអនុវត្តគម្រោងនេះ ហើយបានខិតខំប្រឹងប្រែងកាត់បន្ថយ និងជៀសវាងជាអតិបរិមាលើផលប៉ះពាល់ជាអវិជ្ជមាននានាទាំងនៅក្នុងក្របខណ្ឌក្នុងប្រទេស និងឆ្លងដែន។
រាជរដ្ឋាភិបាលបានធ្វើការសិក្សាលម្អិត និងគ្រប់ជ្រុងជ្រោយ ហើយលទ្ធផលបានបង្ហាញថា គម្រោងនេះជាគម្រោងដែលមានប្រសិទ្ធិភាពសេដ្ឋកិច្ចខ្ពស់ ហើយមិនបង្ករឱ្យមានផលប៉ះពាល់អវិជ្ជមានលើលំហូរទឹក ប្រព័ន្ធអេកូឡូស៊ី និងបរិស្ថានឡើយ ៕
ដោយ ៖ សិលា
