សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ករណីគ្រោះថ្នាក់ចរាចរណ៍មួយ បានកើតឡើងរវាងរថយន្ត នឹងម៉ូតូ បណ្ដាលឲ្យនារីស្រស់ស្អាត៣នាក់ បានរងរបួសធ្ងន់ ដោយបាក់ជើងម្ខាងទាំងអស់គ្នា ខណៈដែលពួកគេកំពុងជិះម៉ូតូ ម៉ាក Scoopyឌុបគ្នា ក្នុងល្បឿនលឿន ក៏ត្រូវរថយន្តកាមរីបាឡែនមួយគ្រឿង បើកបុកយ៉ាងពេញទំហឹងតែម្តង ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងនៅវេលាម៉ោង៣និង៣០នាទី រំលងអធ្រាត្រ ឈានចូល ថ្ងៃទី១៨ ខែសីហា ឆ្នាំ២០១៦ នៅចំណុចទល់មុខហាងលក់សំភារៈសម្រាប់ទារក ត្រង់ផ្លូវបំបែកជា៤ រុក្ខវិថី សម្ដេចប៉ាន កែងជាមួយវិថី ប៉ាស្ទ័រ សង្កាត់បឹងរាំង ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញនារីរងគ្រោះទាំង៣នាក់បានជិះម៉ូតូម៉ាក Scoopy ពណ៌ស ពាក់ស្លាកលេខ ភ្នំពេញ 1BZ-3570 ឌុបគ្នាយ៉ាងលឿន លុះបើកមកដល់ចំណុចផ្លូវបែកជា៤ ដោយមិនបានបន្ថយល្បឿននោះទេ ស្រាប់តែភ្លាមនោះរថយន្តកាមរីបាឡែនមួយគ្រឿង ពាក់ស្លាកលេខ ភ្នំពេញ 2T-1849 ពណ៌ស្ករ បើកបរដោយបុរសម្នាក់ដោយខ្វះការប្រុងប្រយ័ត្នផងដែរនោះ ក៏ជ្រុកទៅបុកគ្នាយ៉ាងពេញទំហឹង បណ្តាលស្រីស្អាតទាំង៣នោះដួលបោកទៅនឹងថ្នល់សន្លប់ស្តូកស្តឹងទាំងអស់គ្នា រងរបួសធ្ងន់ ដោយបាក់ជើងខាងស្តាំទាំងអស់ ភ្លាមនោះសមត្ថកិច្ចនគរបាលមូលដ្ឋានហៅរថយន្តសង្គ្រោះបន្ទាន់២គ្រឿង ដឹកបញ្ចូនទៅសង្គ្រោះបញ្ចូនទៅមន្ទីពេទ្យភ្លាមៗផងដែរ ។
ប្រភពដដែលបានបន្តទៀតថា ក្រោយកើតហេតុ រថយន្ត និងម៉ូតូ ត្រូវបាននគរបាលចរាចរណ៍ខណ្ឌដូនពេញចុះសហការជាមួយកម្លាំងជំនាញវាស់វែងតាមជំនាញរួចយកទៅរក្សានៅការិយាល័យនគរបាលផ្លូវគោក ដើម្បីរង់ចាំដោះស្រាយគ្នាតាមច្បាប់ ៕ ស ដារ៉ា
