សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ:ប្រជាពលរដ្ឋរស់នៅតាមច្រាំងទន្លេ ប្រទះឃើញសាកសពបុរសម្នាក់អណ្តែតទឹកជាប់ច្រវាក់ជើងទាំង២ ហើមស្អុយរលួយទៅហើយ។ ហេតុការណ៍នេះបង្កឲ្យមានការភ្ញាក់ផ្អើលឡើងកាលពីម៉ោងជិត៨ព្រឹកថ្ងៃទី១៩ ខែសីហា ឆ្នាំ២០១៦ ស្ថិតនៅចំណុចច្រាំងទន្លេ ក្នុងសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ។
សមត្ថកិច្ចនគរបាលប៉ុស្តិ៍ព្រែកតាសេកបានឲ្យដឹងថា សាកសពគេនៅមិនទាន់ស្គាល់អត្តសញ្ញាណនៅឡើយទេ គ្រាន់តែដឹកថាស្លៀកខោខូវប៊យ និងពាក់អាវយឺតពណ៌ខ្លាញ់ក្តាម ចំណែកជើង ទាំង២ជាប់ច្រវាក់ចាក់សោ ។
សមត្ថកិច្ចបន្តថា ករណីប្រទះឃើញសាកសពនេះនៅមិនទាន់ដឹងថាជាករណីអ្វីនោះទេ ហើយសមត្ថកិច្ចកំពុងស្រាវជ្រាវនឹងធ្វើកោសល្យវិច្ច័យនៅលើសព ៕ ជ្រោយពេជ្រ
