សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មនុស្ស៨នាក់ទៀតត្រូវបានសមត្ថកិច្ចខណ្ឌសែនសុខឃាត់ខ្លួន បន្ទាប់ពីពួកគេបានទៅប្រមូលផ្តុំគ្នាជក់គ្រឿងញៀននៅចំណុចមុខមន្ទីរពេទ្យព្រះកុសុមៈ(ពេទ្យលោកសង្ឃ) កាលពីវេលាម៉ោង០៥និង៣០នាទីល្ងាច ថ្ងៃទី២១ ខែសីហា ឆ្នាំ២០១៦ ស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
លោកសុខ សុផល នាយប៉ុស្តិ៍នគរបាលរដ្ឋបាលទឹកថ្លា បានឲ្យដឹងថា មុននឹងឃាត់ខ្លួន ជនសង្ស័យទាំង៨នាក់ខាងលើ ដោយមានបញ្ជាពីលោកវរសេនីយ៍ឯក ម៉ក់ ហុង អធិការនគរបាលខណ្ឌសែនសុខ បានឲ្យលោកដឹកនាំកំលាំងចុះធ្វើរដ្ឋបាលនៅចំណុចខាងលើដើម្បីទប់ស្កាត់បទល្មើសផ្សេង ហើយកន្លែងនេះ ជាតំបន់ស្មុគស្មាញ់ សំបូរទៅដោយអ្នកប្រើប្រាស់គ្រឿងញៀនផងនោះ ទើបលោកបានដឹកនាំកំលាំងប៉ុស្តិ៍ទឹកថ្លា និងកំលាំងអន្តរាគមន៍ នៃអធិការដ្ឋានខណ្ឌចុះធ្វើរដ្ឋបាលនៅតំបន់ខាងលើ ឈានដល់ការឃាត់ខ្លួនបានក្រុមប្រើប្រាស់គ្រឿងញៀន៨នាក់ រួមនឹងសម្ភារសំជក់ថ្នាំមួយចំនួន។
បច្ចុប្បន្នជនសង្ស័យទាំង០៨នាក់កំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីចាត់ការតាមផ្លូវច្បាប់ ៕ តុង សីហា
