សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ អ្នកនាំពាក្យអគ្គស្នងការដ្ឋាននគរបាលជាតិ មានកិត្តិយសសូមជម្រាបជូនសាធារណជនឲ្យបានជ្រាបថា កាសែតបរទេសមួយបានផ្សាយចោទប្រកាន់មកលើថ្នាក់ដឹកនាំអគ្គស្នងការដ្ឋាននគរបាលជាតិ។
អគ្គស្នងការដ្ឋាននគរបាលជាតិ សូមបដិសេធទាំងស្រុង ចំពោះការប្រឌិតព័ត៌មាន និងការចោទប្រកាន់ដោយគ្មានមូលដ្ឋានច្បាស់លាស់ របស់បុគ្គលឈ្មោះ ហេង សិទ្ធិ និងការចុះផ្សាយរបស់កាសែត The Cambodia daily ថា អតីតឧកញ៉ា ហេង សិទ្ធិ បានសរសេរលើ បណ្តាញទំនាក់ទំនងសង្គមហ្វេសប៊ុកថា ជនជាតិសិង្ហបុរីឈ្មោះ ភួ ហ្គេចសេង (ហៅតាក់) ចូលសញ្ជាតិខ្មែរ បានសូកប៉ាន់អគ្គស្នងការនគរបាលជាតិ នាយឧត្តសេនីយ៍ ស ថេត ចំនួន៥លានដុល្លារ ដើម្បីដាក់ឈ្មោះខ្លួន (ហេង សិទ្ធិ) ក្នុងបញ្ជីតាមចាប់ខ្លួនរបស់នគរបាលអន្ដរជាតិ Interpol។
ឆ្លងតាមការចុះផ្សាយព័ត៌មានឥតវិជ្ជាជីវៈរបស់កាសែតឌឺខេបូឌាដេលីខាងលើនេះ បានបង្ហាញឲ្យឃើញយ៉ាងច្បាស់ពីចរិតលក្ខណៈដែលមានចេតនាទុច្ចរិត ផ្សព្វផ្សាយព័ត៌មានមិនពិត ក្នុងគោលដៅបម្រើផលប្រយោជន៍ផ្ទាល់ខ្លួន ។ ក្នុងន័យនេះ អគ្គស្នងការដ្ឋាននគរបាលជាតិ សូមស្នើដល់បុគ្គលឈ្មោះ ហេង សិទ្ធិ និងការចុះផ្សាយរបស់កាសែត The Cambodia daily ធ្វើការកែតម្រូវព័ត៌មានអំពីការចុះផ្សាយមិនពិតរបស់ខ្លួនឡើងវិញជាបន្ទាន់។
អាស្រ័យហេតុនេះ សូមសាធារណជនទាំងអស់ មេត្តាជ្រាបជាព័ត៌មាន ៕
ដោយ ៖ សិលា
