សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង ៖ កម្លាំងកងរាជអាវុធហត្ថខេត្តស្ទឹងត្រែងបានបង្ហាញខ្លួនជនជាប់សង្ស័យជួញដូរ ចែកចាយ ប្រើប្រាស់ និង បញ្ជាការលក់ទិញគ្រឿងញៀនពីក្នុងពន្ធនាគារ ក្រោយការបង្ក្រាបរថយន្តមួយគ្រឿង រកឃើញគ្រឿងញៀនមួយចំនួន កាលពី ថ្ងៃទី៦ ខែកញ្ញា ឆ្នាំ២០១៦ ។
ពិរុទ្ធជនម្នាក់ដែលជាប់ឃុំក្នុងពន្ធនាគារខេត្តក្រចេះត្រូវបានមន្ត្រីកងរាជអាវុធហត្ថអះអាងថា ជាជនមានសមត្ថភាពបញ្ជាលក់គ្រឿងញៀនតាមទូរស័ព្ទចេញពីពន្ធនាគារ ឲ្យបក្ខពួករបស់ខ្លួនចែកចាយបន្ត ។ គេ មិនដឹងថា ការគ្រប់គ្រងនៅក្នុងពន្ធនាគារខេត្តក្រចេះនោះមានភាពធូររលុងបែបណាទេ ទើបជនជាប់ឃុំអាចប្រើប្រាស់ទូរស័ព្ទ រកចំណូលពីថ្នាំញៀនបានបែបនេះ ។
ប្រភពពីមន្រ្តីកងរាជអាវុធហត្ថខេត្តបានឲ្យដឹងថាក្រោយការឃាត់ខ្លួនជនសង្ស័យ ចំនួន៣នាក់ រួមជាមួយវត្ថុតាងថ្នាំញៀន ប្រភេទម៉ាទឹកកកមួយកញ្ចប់ កាលពីថ្ងៃទី៣ ខែកញ្ញា នៅភូមិច្រប ឃុំក្បាលរមាស ស្រុកសេសាន ជនម្នាក់ក្នុងចំណោមនេះ ឆ្លើយថា ថ្នាំញៀនដែលសមត្ថកិច្ចដកហូត នោះខ្លួនបានទិញពីឈ្មោះ សេង គឹមសំ មានទីលំនៅភូមិរកាកណ្តាល សង្កាត់រកា កណ្តាល ក្រុងក្រចេះតាមទូរស័ព្ទដែលជន នោះកំពុងជាប់ពន្ធនាគារនៅខេត្តក្រចេះ ។
ក្រោយពីទាក់ទងរួចក៏មានជនមិនស្គាល់ អត្តសញ្ញាណបានយកថ្នាំញៀនទាំងនោះមកប្រគល់ឲ្យខ្លួនតាមតម្លៃកុម្ម៉ង់ចាប់ពី៥០ដុល្លារដល់២០០ដុល្លារ ហើយបន្តទៅចែកចាយឲ្យអ្នកអារឈើនៅភូមិច្រប ឃុំក្បាល រមាស ស្រុកសេ សាន ។ ក្រោយការសាក សួរចម្លើយជនសង្ស័យបានសារភាពពីការបញ្ជាលក់និងទិញពីពិរុទ្ធដែលជាប់ឃុំនៅពន្ធនាគារខេត្តក្រចេះ ។
ដោយមានការអនុញ្ញាតពីលោក ជា ពេជ្រ ព្រះរាជអាជ្ញាអមសាលាដំបូងខេត្តស្ទឹងត្រែងឲ្យពន្លាតដែនដីកម្លាំងកងរាជ អាវុធហត្ថខេត្តស្ទឹងត្រែង បានសហការជាមួយកងរាជអាវុធហត្ថខេត្តក្រចេះ ព្រមទាំងមានការដឹកនាំសម្របសម្រួលនីតិវិធីពីលោក ទី សុវិនថាល់ ព្រះរាជអាជ្ញាអម សាលាដំបូងខេត្តក្រចេះសម្រេចឲ្យឃាត់ ជនឈ្មោះ សេង គឹមសំ ចេញពីពន្ធនាគារ ខេត្តក្រចេះមកធ្វើការសាកសួរបន្តតាមនីតិវិធី នៅបញ្ជាការដ្ឋានកងរាជអាវុធហត្ថខេត្តស្ទឹងត្រែង ។
មន្ត្រីការិយាល័យប្រឆាំងគ្រឿងញៀននៃបញ្ជាការដ្ឋានកងរាជអាវុធហត្ថខេត្ត និយាយថា ជនសង្ស័យដែលឃាត់ខ្លួនមានចំនួន៤នាក់ តែក្រោយការសាកសួរមានជនម្នាក់ពុំមានពាក់ព័ន្ធក្នុងសំណុំរឿងជួញដូរចែកចាយថ្នាំញៀនទេ ទើបមន្ត្រីអនុវត្តច្បាប់ដោយមានការសម្របសម្រួលពីព្រះរាជអាជ្ញា ធ្វើការដោះលែងវិញ ។
ជនសង្ស័យដែលត្រូវបានឃាត់ខ្លួននិងកសាងសំណុំរឿងបញ្ជូនទៅអយ្យការអមសាលាដំបូងខេត្តរួមមាន ១-ឈ្មោះ ឡុង វិឆ័យ ភេទប្រុស អាយុ២៥ឆ្នាំ ជាជាងធ្វើផ្ទះ រស់នៅភូមិរកាកណ្តាល សង្កាត់រកាកណ្តាល ក្រុងក្រចេះ , ២-ឈ្មោះ ចិន សុខឃី ភេទ ប្រុស អាយុ២៤ឆ្នាំ ជាជាងធ្វើផ្ទះ រស់នៅ ភូមិរកាកណ្តាល សង្កាត់រកាកណ្តាល ក្រុង ក្រចេះ , ៣-ឈ្មោះ សេង គឹមសំ ភេទប្រុស អាយុ៣០ឆ្នាំ ជាពិរុទ្ធជនជាប់ពន្ធនាគារ រស់នៅភូមិរកាកណ្តាល សង្កាត់រកាកណ្តាល ក្រុងក្រចេះ ។
ពិរុទ្ធជន សេង គឹមសំ ត្រូវកម្លាំងសមត្ថកិច្ចចាប់ខ្លួនបញ្ជូនទៅពន្ធនាគារ កាលពីថ្ងៃ ទី១៧ ខែតុលា ២០១៥ ពីបទចែកចាយគ្រឿងញៀនប្រព្រឹត្តនៅខេត្តក្រចេះ ។
បច្ចុប្បន្ន ជននេះត្រូវកងរាជអាវុធហត្ថ កសាងសំណុំរឿងបញ្ជូនទៅអយ្យការអមសាលាដំបូងដើម្បីបន្តនីតិវិធី រួមជាមួយថ្នាំញៀនប្រភេទមេតំហ្វេតាមីន (ម្សៅក្រាម)ទូរស័ព្ទដៃពីរគ្រឿង រថយន្តកាមរីបាឡែន មួយគ្រឿង ពណ៌ខ្មៅ ពាក់ស្លាកលេខភ្នំពេញ ២S-៥១៥៧ ប្រាក់ចំនួន៣០០ដុល្លារ ព្រមទាំងឧបករណ៍សម្រាប់ជក់គ្រឿងញៀនមួយ ចំនួន ៕ ហេង នរិន្ទ្រ
