សមាជិកសភាអុីរ៉ង់អំពាវនាវឱ្យទីក្រុងតេអេរ៉ង់អភិវឌ្ឍគ្រាប់បែកនុយក្លេអ៊ែរបន្ទាប់ពីការព្រមានរបស់សហរដ្ឋអាមេរិក

ចែករំលែក៖

យោងតាមសមាជិកសភាអុីរ៉ង់លោក Ahmad Naderi ទំនាក់ទំនងរវាងសហរដ្ឋអាមេរិកនឹងកូរ៉េខាងជើងបង្ហាញថា ការមានឃ្លាំងអាវុធនុយក្លេអ៊ែរបាននាំមកនូវសន្តិសុខដល់ទីក្រុងព្យុងយ៉ាង យ៉ាងច្បាស់។
លោក Ahmad Naderi សមាជិកនៃគណៈប្រធានសភាអុីរ៉ង់បាននិយាយកាលពីថ្ងៃទី 31 ខែមីនាថា ប្រធានាធិបតីអាមេរិកលោក Donald Trump នឹងមិនអាចគំរាមកំហែងវាយប្រហារប្រទេសអុីរ៉ង់បានទេ ប្រសិនបើទីក្រុង Tehran មានអាវុធនុយក្លេអ៊ែរ។ លោក Ahmad Naderi សមាជិកនៃគណៈប្រធានសភាអុីរ៉ង់បានថ្លែងថា មួយថ្ងៃមុននេះ លោក Trump បានព្រមានពីការវាយប្រហារដែលមិនធ្លាប់មានពីមុនមកលើប្រទេសអុីរ៉ង់ ប្រសិនបើខ្លួនមិនទទួលយកកិច្ចព្រមព្រៀងនុយក្លេអ៊ែរ។
លោក Trump បានប្រាប់ NBC News នៅថ្ងៃទី 30 ខែមីនាថា “វានឹងជាការទម្លាក់គ្រាប់បែកដូចដែលពួកគេមិនដែលឃើញពីមុនមក” ។ សមាជិកសភា Naderi ជឿជាក់ថា អុ៏រ៉ង់អាចធ្វើតាមការដឹកនាំរបស់កូរ៉េខាងជើងក្នុងការពង្រឹងសន្តិសុខរបស់ខ្លួនប្រឆាំងនឹងការគំរាមកំហែងនេះ។
លោកបានអះអាងថា លោក Trump នឹងមិនធ្វើការគំរាមកំហែងស្រដៀងគ្នានេះចំពោះអុីរ៉ង់ទេ ប្រសិនបើក្រុងតេអេរ៉ង់មានអាវុធនុយក្លេអ៊ែរដែរ។
លោក Naderi បានសង្កត់ធ្ងន់ថា “អស់ជាច្រើនឆ្នាំមកនេះ បញ្ញវន្ត និងអ្នកគាំទ្រជាច្រើននៃប្រទេស និងបដិវត្តន៍អ៊ិស្លាមបានអំពាវនាវឱ្យមានការសាកល្បង និងមានអាវុធនុយក្លេអ៊ែរដោយបើកចំហ។ ប្រសិនបើយើងមានអាវុធនុយក្លេអ៊ែរផងដែរនោះ លោក Trump នឹងមិនគំរាមកំហែងទម្លាក់គ្រាប់បែកនោះទេ” ៕ ដោយ៖ ធីរីណា