សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ ៖ គ្រប់កិច្ចការរដ្ឋបាលខេត្តកំពង់ធំ យកចិត្តទុកដាក់ ជុំវិញ ពង្រឹងសន្តិសុខ សណ្តាប់ធ្នាប់ ជូនប្រជាពលរដ្ឋ ជាក្តីបំណងដែលប្រជាពលរដ្ឋក្នុងមូលដ្ឋានចង់បាន ។ បច្ចុប្បន្ន រដ្ឋបាលខេត្តកំពង់ធំ បានបំពាក់ភ្លើងសូឡាតាមផ្លូវជាតិលេខ ៦ សម្រួលការធ្វើដំណើរពេលរាត្រី និងដើម្បីពង្រឹងសន្តិសុខ បន្ថែមទៀត កាន់តែធ្វើឱ្យខេត្តមួយនេះប្រកបដោយសោភ័ណភាព ភ្លឺត្រចះត្រចង់នាពេលរាត្រី ។
សូមបញ្ជាក់ថា ៖ ក្រោមការចង្អុលបង្ហាញរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងក្រោមការគាំទ្រពី លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ, រដ្ឋបាលខេត្តកំពង់ធំបានចាប់ផ្តើមដឹកនាំអនុវត្តជាជំហានៗ ជាមួយការប្រមូលកៀរគរកម្លាំងសរុប និងមធ្យោបាយសរុបពីគ្រប់មជ្ឈដ្ឋាន នូវ «យុទ្ធនាការបំពាក់បង្គោលភ្លើងសូឡា នៅតាមដងផ្លូវជាតិលេខ ៦ » នៅក្នុងភូមិសាស្ត្រខេត្តកំពង់ធំ ពីព្រំប្រទល់ខេត្តកំពង់ចាម រហូតដល់ព្រំប្រទល់ខេត្តសៀមរាប ប្រវែងសរុប ១៤៤ km ឱ្យបានរួចរាល់ទាំងស្រុង នៅត្រឹមដំណាច់ឆ្នាំ២០២៦ ខាងមុខ។
លោក នួន ផារ័ត្ន អភិបាលខេត្តកំពង់ធំ អះអាងតាមរយៈបណ្តាញទំនាក់ទំនងសង្គមហ្វេសប៊ុកថា ៖ គម្រោងដ៏ធំនេះ ពិតជាមានសារៈសំខាន់ណាស់ សម្រាប់ធានាភាពងាយស្រួលក្នុងការធ្វើដំណើររបស់ប្រជាពលរដ្ឋនៅពេលមេឃងងឹត និងចំពោះ ប្រជាពលរដ្ឋដែលរស់នៅតាមដងផ្លូវជាតិលេខ ៦ ព្រមទាំងដើម្បីពង្រឹងការងារសន្តិសុខផងដែរ។
សូមជម្រាបថា ៖ នេះជាលើកទី១ សម្រាប់ខេត្តកំពង់ធំ ធ្វើជាគំរូ បំពាក់ភ្លើងសូឡាតាមផ្លូវជាតិ ក្នុងភូមិសាស្ត្រខេត្តរហូតដល់ខេត្តៗជាប់ព្រំប្រទល់ ពិតជាផ្តល់សេចក្តីរីករាយ ពេញចិត្តពីបងប្អូនប្រជាពលរដ្ឋយើង ៕
ដោយ ៖ សិលា
