សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ ជាការស្វាគមន៍ក្នុងពិធីបុណ្យហាជ្ជី មុស្លិមទូទាំងសកល លោក ក៏ដូចជានៅកម្ពុជាផងដែរ នោះ អង្គការមូលនិធិអភិវឌ្ឍន៍មុស្លិមកម្ពុជា សហការជាមួយគណៈដឹកនាំជាន់ខ្ពស់ នៃសាសនាឥស្លាមកម្ពុជា តែងតែបានទទួលអំណោយមនុស្សធម៍ជាគោប្រគល់ទៅឲ្យ គ្រប់បណ្ដាខេត្ត ក្រុង ស្រុក ខណ្ឌ ដែលជាជំនួយមកពីប្រទេសម៉ាឡេស៊ី ទួរគី និង ប្រទេសឥស្លាមផ្សេងៗទៀត។
ជាក់ស្តែងសម្រាប់ឆ្នាំ១៤៣៧ មូហាំម៉ាត់សាគរាជ ត្រូវនឹងឆ្នាំ២០១៦ នេះ អង្គការមូលនិធិអភិវឌ្ឍន៍មុស្លិមកម្ពុជា សហការជាមួយនឹងគណៈ ដឹកនាំជាន់ខ្ពស់ នៃសាសនាឥស្លាមកម្ពុជា បានទទួលអំណោយជាគោចំនួនប្រមាណជិត២០០០ក្បាល និងពពែប្រមាណ៥០០ក្បាល គិតជាទឹកប្រាក់ប្រមាណ១លានដុល្លារ ដែលទទួលបានមកពីបណ្តាអង្គការ ម្ចាស់ជំនួយធំជាងគេ គឺប្រទេសម៉ាឡេស៊ី ។ អង្គការមូលនិធិអភិវឌ្ឍន៍មុស្លិមកម្ពុជាសហការជាមួយសមាគម សម្ព័ន្ឋយុវជនមុស្លិមកម្ពុជា បានទទួលគោ ២២០ក្បាលពីមូលនិធិ Turkey Diyanet ប្រទេសទួរគី យកមកកាប់យកសាច់ ដើម្បីចែកចាយដល់បងប្អូន ប្រជាពលរដ្ឋ ក្រីក្រ ទៅតាមបណ្តាខេត្ត ក្រុង ស្រុក ខណ្ឌ ចំនួនប្រមាណជិត ៨០០គ្រួសារ ។
ក្នុងពិធី ផ្ដល់សាច់គោដែលធ្វើឡើងនៅភូមិត្រពាំងឈូក ឃំុបឹងស្រុកបារាយណ៍ ខេត្តកំពង់ធំ កាលពី ថ្ងៃទី១៤ ខែកញ្ញា ឆ្នាំ២០១៦ ដែល មានការចូលរួមពីតំណាងមេភូមិនានា មកពីខេត្តក្រចេះ ត្បូងឃ្មំុ កំពង់ចាម រាជធានីភ្នំពេញ និងតំបន់ជុំវិញផង នោះ លោកអូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្ត្រី និងជាប្រធានអង្គការមូលនិធិអភិវឌ្ឍន៍មុស្លិមកម្ពុជា បានបញ្ជាក់ថា៖ ការចែកសាច់ជូន បងប្អូនប្រជាពលរដ្ឋ ក្រីក្រក្នុងពិធីបុណ្យហាជ្ជី ជាអំពើបុណ្យកុសលខ្ពង់ខ្ពស់ណាស់ ក្នុងពិធីបុណ្យមួយនេះ ខណៈដែលមុស្លិម រាប់លាននាក់ដែលមានលទ្ឋភាពទៅប្រារព្វពិធីបុណ្យហាជ្ជី នៅក្រុងម៉ាកាស់ ប្រទេសអារ៉ាប៊ីសាអូឌីតឯណោះ អ្នកដែលមានលទ្ធិភាព បានទៅគ្រប់ៗគ្នា រួមទាំងសាសនិកកម្ពុជាយើង៨០០នាក់ផងដែរ ក៏ត្រូវបរិច្ចាកសត្វពពែ រាប់រយក្បាល សម្រាប់ផ្តល់ជូនជនក្រីក្រនៅក្នុងថ្ងៃបុណ្យ រ៉ាយ៉ាហាជី្ជ ដែលត្រូវនឹងថ្ងៃទី១២ ខែកញ្ញា ឆ្នាំ២០១៦ ។
លោក អូស្មាន ហាស្សាន់ បាន បន្ដថា៖ ពិធីចែកសាច់គោ ជូនជនក្រីក្រនេះ អង្គការមូលនិធិអភិវឌ្ឍន៍មុស្លិមកម្ពុជា នឹងបន្តចែករហូតដល់ថ្ងៃទី១៥,១៦ ខែកញ្ញា ឆ្នាំ២០១៦ ។
ជាមួយគ្នានេះដែរ អូស្មាន ហាស្សាន់ លោកក៏បាន សម្តែង នូវការកោតសរសើរ ដល់រាជរដ្ឋាភិបាលកម្ពុជា ដែលមានសម្តេចតេជោហ៊ុន សែន ជានាយករដ្ឋមន្រ្តី តែងតែបង្កភាពងាយស្រួលដល់ប្រជាជាតិរបស់ខ្លួន និងការនាំអំណោយមនុស្សធម៍ នានា ពីបណ្តាសប្បុរសជនក្រៅប្រទេស មិនតែប៉ុណ្ណោះ ក្នុងពិធីបុណ្យហាជ្ជី ឆ្នាំ២០១៦ នេះ ដោយកិច្ចអន្តរាគម របស់ប្រមុខរាជរដ្ឋាភិបាលកម្ពុជា បានសម្រួលដល់ការងារចេញទិដ្ឋាការរបស់សាសនិក ដែលអញ្ជើញទៅប្រារព្វពិធីបុណ្យហាជ្ជី ឆ្នាំនេះ បានគ្រប់ចំនួន ដោយពុំមានការ រាំងស្ទះក្នុងការទទួលទិដ្ឋាការអ្វីឡើយ។
លោកអូស្មាន ហាស្សាន់ ក៏បានថ្លែងអំណរគុណ ដល់បណ្តាសប្បុរសជនអន្តរជាតិ ក៏ដូចជាមូល និធិ Tukey Diyanet ដែលតែងតែសហការរាល់សកម្មភាពមនុស្សធម៍ នានាជាមួយអង្គការមូលនិធិអភិវឌ្ឍន៍មុស្លិមកម្ពុជា ដើម្បីចូលរួមលើកស្ទួយ និងកាត់បន្ថយភាពក្រីក្រនៅកម្ពុជា ៕ សំរិត
