សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ សមត្ថកិច្ចនគរបាលស្រុក សហការជាមួយនគរបាលប៉ុស្តិ៍បានឃាត់ខ្លួនជនសង្ស័យម្នាក់ទាំងប្រផាប់ចាប់ប្រផីង បន្ទាប់ពីគំរាមដុតផ្ទះយាយរបស់ខ្លួនហើយខឹងសមត្ថកិច្ចមកអន្តរាគមន៏កាលពីវេលាម៉ោង៨យប់ថ្ងៃទី២១ខែកញ្ញាឆ្នាំ២០១៦ក្នុងភូមិប្រម៉ាឃុំស្វាយយាស្រុកស្វាយជ្រំ។
យោងតាមសមត្ថកិច្ចនគរបាលស្រុកស្វាយជ្រំបានអោយដឹងថា វេលាម៉ោង៨យប់ លោកសៅ សារី នាយរងប៉ុស្តិ៍នគរបាលរដ្ឋបាលស្វាយយា បានទទួលព័ត៌មានពីឈ្មោះអៀម នី ជាមេភូមិប្រម៉ា ថាមានជនសង្ស័យឈ្មោះម៉ន មាស ភេទប្រុសអាយុ១៨ឆ្នាំមុខរបរធ្វើស្រែនៅភូមិប្រម៉ាឃុំស្វាយយា បំរុងដុតផ្ទះរបស់យាយ ដែលខ្លួនកំពុងរស់នៅដោយខឹងមិនអោយលុយផឹកស្រា។
បន្ទាប់ពីទទួលបានព័ត៍មានភ្លាម លោកសៅ សារី ដែលកំពុងឈរជើងនៅភូមិប្រម៉ា បានជិះម៉ូតូអង្គភាពទៅដល់ផ្ទះលោកមេភូមិប្រម៉ា ។
នៅពេលលោកសៅ សារីទៅដល់មួយស្របក់ស្រាប់តែជនសង្ស័យនេះ ដើរមកដល់ខាងលិចផ្ទះលោកមេភូមិ ក៏បានវាយស្លាកគណបក្សនយោបាយ(មិនខូចខាតនោះទេ) រួចក៏ដើរកាន់កាំបិតផ្គាក់ចំនួន2ដើម ចូលផ្ទះឈ្មោះ អៀម នី ជាមេភូមិប្រម៉ា ដោយស្រែកថា អាណាទៅប្តឹងអោយប៉ូលីសមក អញ់មិនខ្លាចទេ រួចស្ទុះដេញកាប់លោកសៅ សារី ជុំវិញគ្រែក្រោមផ្ទះ លោកមេភូមិ ហើយលោកសៅ សារី បានគេចខ្លួនរួចពីការដេញកាប់ ជនសង្ស័យនេះបានស្ទុះទៅកាប់ម៉ូតូអង្គភាព ដែលលោកសៅ សារី ជិះធ្លាយកង់ទាំង២ រួចហើយបើកម៉ូតូនេះចេញពីផ្ទះមេភូមិឡើងលើផ្លូវថ្នល់ សំដៅទៅទិសខាងត្បូង បានប្រហែល១០០ម៉ែត្រ ជិតដល់ផ្ទះរបស់ខ្លួន ក៏បានជួបកំលាំងប៉ុស្តិ៍ស្វាយយាដែលមកជួយធ្វើអន្តរាគមន៍ ហើយកំលាំងសមត្ថកិច្ចបានបាញ់គំរាមចំនួន២គ្រាប់ ជនសង្ស័យបានផ្តួលម៉ូតូ ហើយសមត្ថកិច្ច ក៏បានឃាត់ខ្លួនជនសង្ស័យយកមកប៉ុស្តិ៍នគរបាបរដ្ឋបាលស្វាយយា ដើម្បីកសាងសំណុំរឿងតាមនីតិវិធី ៕ យឹម សុថាន
