សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នៅព្រឹកថ្ងៃទី១៣ ខែធ្នូ ឆ្នាំ២០២៥ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជួបប្រជុំជាមួយក្រុមការបច្ចេកទេសផ្លូវ-ស្ពាន និងបានត្រៀមខ្លួនរួចរាល់ ដើម្បីជួសជុល និងស្តារឡើងវិញស្ពានជ័យជម្នះ (ស្ពានមេទឹក)ដែលត្រូវបានទាហានឈ្លានពានថៃ ប្រើប្រាស់យន្តហោះ F-16 ទម្លាក់គ្រាប់បែក បណ្តាលឱ្យមានការខូចខាតយ៉ាងធ្ងន់ធ្ងរ។ នេះបើតាមឯកឧត្តមអ្នកនាំពាក្យក្រសួង បន្ទាប់ពីកិច្ចប្រជុំ នៅថ្ងៃទី១៣ ខែធ្នូ ឆ្នាំ២០២៥។
បើតាម អ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់បន្ថែមថា៖ «នៅចំពោះស្ថានភាពបែបនេះ យើងកំពុងរង់ចាំការអនុញ្ញតិពីសមរភូមិមុខ ដើម្បីចូលជួសជុល និងធ្វើផ្លូវវាង ដើម្បីធានាការតភ្ជាប់ សម្រួលដល់ការធ្វើចរាចរឡើងវិញ»។
សូមបញ្ជាក់ថា ស្ពានជ័យជំនះ (ស្ពានមេទឹក) ត្រូវបានស្ថាបនារួចរាល់នៅក្នុងឆ្នាំ២០១៨ ដោយក្រុមហ៊ុនចិន CRBC។ ស្ពាននេះមានចំងាយពីព្រំដែនប្រមាណ ៨គីឡូម៉ែត្រ ដែលជាច្រកតភ្ជាប់ទៅកាន់ឃុំថ្មដារ ស្រុកវាលវែង។
សូមបញ្ជាក់ថា យោធាថៃបានបើកការឈ្លានពានកម្ពុជា ចាប់តាំងពីរថ្ងៃទី០៧ ខែធ្នូ ឆ្នាំ២០២៥ និងបានពង្រីកការវាយប្រហាររបស់ខ្លួនមកលើហេដ្ឋារចនាសម្ព័ន្ធស៊ីវិល និងជនស៊ីវិលកម្ពុជា បណ្តាលឱ្យមានការស្លាប់ និងរបួសជនស៊ីវិល ជាច្រើននាក់ និងខូចខាតហេដ្ឋារចនាសម្ព័នស៊ីវិលជាច្រើនកន្លែង រួមមាន ប្រាសាទបុរាណ វត្តអារាម សាលារៀន មន្ទីរពេទ្យ ផ្ទះរបស់ប្រជុំជន។ល៕
