សារព័ត៌មាន នគរវត្ត តែងតែនាំមុខគេជានិច្ច
ខេត្តក្រចេះ៖ ជនសង្ស័យពីរនាក់ត្រូវបានកម្លាំងកងរាជអាវុធហត្ថលើផ្ទៃប្រទេស សហការជាមួយអាវុធហត្ថស្រុកចិត្របុរី និងមន្ត្រីផ្នែករដ្ឋបាលព្រៃឈើក្រចេះ ឃាត់ខ្លួន និងគ្រោងនាំខ្លួនទៅ តុលាការក្រោយពីមានការសង្ស័យថា មានជាប់ពាក់ព័ន្ឋនិងជំនួញរត់ពន្ឋឈើប្រណិតខុសច្បាប់ មួយឡានមានបរិមាណជាង១ម៉ែត្រគូប ។
មន្រ្តីអាវុធហត្ថស្រុកចិត្របុរីឲ្យដឹងថា ជនពីរនាក់រួមនិងរថយន្តដឹកឈើពណ៍ត្រអីគ្មានស្លាកលេខ មានផ្ទុកឈើចំនួន៣០កំណាត់តូច ធំ ស្មើរនិងជាង១មែត្រគូបសុទ្ឋសឹងជាឈើធ្នង់និង ឈើនាងនួនគឺចាប់បង្រ្កាបបានកាលពីព្រឹកថ្ងៃទី៨ខែតុលានៅលើផ្លូវជាតិលេខ៧ ក្នុងឃុំសំបុក ស្រុកចិត្របុរី ខេត្តក្រចេះ ។
ជនទាំងពីរនាក់នេះម្នាក់ឈ្មោះ ថន ប៊ុនធា ជាព្រូរថយន្ត និងម្នាក់ទៀតឈ្មោះ នៅ ធារ៉ា ជាអ្នកបើកបររថយន្ត ជនសង្ស័យទាំងពីរនាក់មានទីលំនៅក្នុងស្រុកស្នួល ខេត្តក្រចេះ និងក៏ត្រូវបានកម្លាំង ប៉េអ៊ឹមវាយខ្នោះនាំមកទីបញ្ជាការរង់ចាំការបញ្ជូនខ្លួនបន្ត ។
បើតាមចម្លើយសារភាពរបស់ជនជាប់ពាក់ព័ន្ឋ និងជំនួញរត់ពន្ឋឈើទាំងពីរនាក់ ខាងលើបានប្រាប់សមត្ថកិច្ចឱ្យដឹងថា ការនាំឈើរបស់ពួកគេគ្រាន់តែជាការស៊ីឈ្នួលដឹកជញ្ជូន ឱ្យឈ្មោះ ឈី មានទីលំនៅ ក្នុងផ្សារកោះខ្ញែរ ក្នុងឃុំអូរគ្រៀង ស្រុកសំបូរ និងមានអ្នករត់ការតាមដងផ្លូវ ឈ្មោះ ផល្លារ ហើយពួកគេបាននិយាយទៀតថា ឈើទាំងនេះ ត្រូវបានថៅកែឈើឈ្មោះ ឈី បញ្ជាឱ្យដឹកជញ្ជូនឆ្ពោះចូលទៅស្រុកស្នួល ។
គេនៅមិនទាន់ដឹងថា តើសមត្ថកិច្ចនិងមានវិធានការយ៉ាងណាចំពោះអ្នកនៅពី ក្រោយរថយន្តដឹកឈើខុសច្បាប់មួយនេះយ៉ាងណានៅឡើយទេ បើទោះបីជាគេបានស្គាល់ អត្តសញ្ញាណថា មានឈ្មោះ ឈី ជាមេឈ្មួញរកស៊ីឈើខុសច្បាប់នៅចំនុចកោះខ្ញែរក្នុងឃុំ អូរគ្រៀង ស្រុកសំបូរ ខេត្តក្រចេះ នោះក៏ដោយ។
នៅជុំវិញការឃាត់ខ្លួនជនពីរនាក់នេះ មន្រ្តីអាវុធហត្ថស្រុកចិត្របុរី បានបញ្ជាក់ថា ក្រោយការឃាត់ខ្លួននិងនាំខ្លួនមកសួរនាំរួច រថយន្តដឹកឈើនិងឈើប្រណិត ជាង១មែត្រគូប ត្រូវបានចាត់បញ្ជូនទៅឲ្យរដ្ឋបាលព្រៃឈើក្រចេះ ចំណែកជនជាប់ពាក់ពន្ឋ ត្រូវបានឃុំខ្លួនបណ្តោះអាសន្ន នៅទីបញ្ជារការរដ្ឋានអាវុធហត្ថខេត្ត ហើយក្រោងនិងបញ្ជូនទៅតុលាការបន្ត ៕ កោះទ្រុង
