សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ធ្វើសកម្មភាពគាស់បន្ទប់ជួលប្រជាពលរដ្ឋ លួចបានទូរទស្សន៍ ខណៈដើរចេញមកក្រៅត្រូវបានប្រជាពលរដ្ឋប្រទះឃើញចាប់វាយទ្រមខ្លួន ទើបប្រគល់ឲ្យសមត្ថកិច្ច ។
ករណីគាស់បន្ទប់នេះ កើតឡើងនៅវេលាម៉ោង២រសៀល ថ្ងៃទី២០ ខែតុលា ឆ្នាំ២០១៦ ស្ថិតនៅភូមិតាងួន សង្កាត់កាកាប ខណ្ឌពោធិ៍សែនជ័យ ។
ជនសង្ស័យមានឈ្មោះ សិន សុធីម ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់ភូមិចំការឪឡឹក សង្កាត់កាកាប ខណ្ឌពោធិ៍សែនជ័យ មានស្រុកកំណើតភូមិព្រៃអង្គ ឃុំភ្នំតូច ស្រុកអង្គរជ័យ ខេត្តកំពត ត្រូវបានចាបៀខ្លួន ។
តាមចម្លើយសារភាព ជនសង្ស័យបានឲ្យដឹងថា បន្ទប់ដែលខ្លួនគាស់លើកនេះ ខ្លួនបានធ្វើសកម្មភាពគាស់ចំនួន២ដង លើកទី១លួចបាន លុយ សម្ភារៈមួយចំនួន លើកទី២នេះ លួចបានទូរទស្សន៍ សម្ភារៈមួយចំនួន ត្រូវបានអ្នកក្បែរខាង ឃើញទាន់ស្រែកចាប់ខ្លួនបានតែម្តង ។
តាមប្រជាពលរដ្ឋបានឲ្យដឹងថា ចំណុចខាងលើ ជារឿយៗ តែងតែមានជនសង្ស័យធ្វើសកម្មភាពគាស់បន្ទប់ជួល មកដល់រសៀលថ្ងៃនេះ ខណៈដែលម្ចាស់តាមបន្ទប់និមួយៗភាគច្រើនរវល់ចេញទៅបំពេញការងារ ទើបជនសង្ស័យមានឱកាសលបលួចធ្វើសកម្មភាព គាស់សោ គាស់ទ្វារចប៉ុនប៉ងចូលលួចទ្រព្យសម្បត្តិ ត្រូវបានពលរដ្ឋនៅក្បែរខាងឃើញទាន់ ស្រែកនាំគ្នាព័ទ្ធចាប់បានភ្លាមៗ រួចប្រគល់ឲ្យទៅនគរបាលប៉ុស្តិ៍ ដើម្បីចាត់វិធានការ ។
ក្រោយពីឃាត់ខ្លួនជនសង្ស័យ ត្រូវបាននាំទៅសាកសួរនៅប៉ុស្តិ៍កាកាប ដើម្បីកសាងសំណុំរឿង បញ្ជូនទៅផ្នែកជំនាញ ចាត់ការបន្តទៅតាមនីតិវិធី ។
គួររំលឹកថា នៅក្នុងខណ្ឌពោធិ៍សែនជ័យកន្លងមក តែងតែកើតមានអំពើ លួច ឆក់ ប្លន់ ដែលបង្កអសន្តិសុខ ហើយប្រជាពលរដ្ឋក៏បានសំណូមពរដល់អាជ្ញាធរសមត្ថកិច្ចមូលដ្ឋានបន្ថែមការការពារសុខសុវត្ថិភាពរបស់គាត់ផង ៕ សុខាសែនជ័យ
