សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ៖ កាលពីវេលាម៉ោង៣និង១៥នាទីរសៀល ថ្ងៃទី៨ ខែវិច្ចិកា ឆ្នាំ២០១៦ កម្លាំងសមត្ថកិច្ចនគរបាលសេដ្ឋកិច្ច សហការជាមួយមន្រ្ដីជំនាញរដ្ឋបាលព្រៃឈើស្ទោង ស្ទាក់ចាប់បានរថយន្ដសាំយ៉ុង១គ្រឿងលួចដឹកឈើគ្រញូងចេញពីទឹកដីស្រុកស្ទោង ឆ្លងកាត់ទីរួមខេត្តកំពង់ធំមកជាប់អន្ទាក់នៅចំណុចភូមិ កំពង់ធំ ឃុំកំពង់រទេះ ក្រុងស្ទឹងសែន ខេត្តកំពង់ធំ ។
តាមប្រភពព័ត៌មានពីមន្រ្ដីជំនាញបានឲ្យដឹងថា ក្រោយពីទទួលបានព័ត៌មានសម្ងាត់ពីបណ្ដាញរួចមក ត្រូវបានលោក អ៊ិត សុធា ព្រះរាជាអាជ្ញា អមសាលាដំបូងខេត្តកំពង់ធំបញ្ជាអោយឃាត់រថយន្ដសាំយ៉ុងនៅចំណុចខាងលើ ព្រមទាំងមនុស្ស២នាក់ បញ្ជូនទៅកាន់ផ្នែករដ្ឋបាលព្រៃឈើស្ទោង ។
ជនសង្ស័យមានឈ្មោះ ហ៊ាន ស្រាង ភេទប្រុស អាយុ ៤៣ឆ្នាំ រស់នៅក្នុងភូមិ ត្រាចជ្រុំ ឃុំព្រោជ ស្រុកស្ទោង ខេត្តកំពង់ធំ និងតៃកុងរថយន្ដ ឈ្មោះ ម៉ន ផល្លា ភេទប្រុស អាយុ ២៨ឆ្នាំ រស់នៅភូមិ ស្វាយ ស ឃុំកំពង់ចិនត្បូង ស្រុកស្ទោង ខេត្តកំពង់ធំ និងវត្ថុតាង មានឈើគ្រញូងចំនួន ៤ដុំធំៗ ទំងន់ ១៧០គីឡូក្រាម ទាំងមនុស្ស និងវត្ថុតាង ត្រូវបានមន្រ្ដីជំនាញកសាងសំណុំរឿងបញ្ជូនទៅតុលាការនៅថ្ងៃទី៩ ខែវិច្ចិកា ឆ្នាំ២០១៦ ៕ ប៊ុន រិទ្ធី
