បុរសម្នាក់ស្លាប់ និងពីរនាក់របួសស្រាលក្នុងហេតុការណ៍គ្រោះថ្នាក់ចរាចរណ៍ម៉ូតូបុកជាមួយគោយន្ដនៅស្រុកសន្ទុក

ខេត្តកំពង់ធំ៖ កាលពីវេលាម៉ោង១២ និង៤០នាទី ថ្ងៃទី១៣ ខែវិច្ឆិកា ឆ្នាំ២០១៦ នៅលើកំណាត់ផ្លូវជាតិលេខ ៦ ចំនុចភូមិធម្មនាថ ឃុំតាំងក្រសាំង ស្រុកសន្ទុក ខេត្តកំពង់ធំ មានករណីគ្រោះថ្នាក់ចរាចរណ៍កើតឡើង រវាងម៉ូតូបុក និង គោយន្តធ្វើឲ្យបុរសម្នាក់ស្លាប់និងពីរនាក់របួសស្រាល ។

តាមប្រភពព័ត៌មានពីសមត្ថកិច្ចនគរបាលចរាចរណ៍បានឲ្យដឹងថា អ្នកបើកបរម៉ូតូ ឈ្មោះ ឡៃ ហ៊ិន ភេទ ប្រុស អាយុ ២៦ ឆ្នាំ ស្នាក់នៅភូមិថ្នល់បែក ឃុំស្វាយទាប ស្រុកចំការលើ ខេត្តកំពង់ចាម (របួសស្រាល)បានបើកបរម៉ូតូម៉ាកហុងដា C125 ពណ៌ខ្មៅ ពាក់ផ្លាកលេខ កំពង់ចាម 1N-5643 អ្នករួមដំណើរជាមួយ មានឈ្មោះ ១ ឈ្មោះ ឆេង អាន ភេទ ប្រុស អាយុ ១៧ ឆ្នាំ ស្នាក់នៅភូមិ ឃុំ ជាមួយអ្នកបើកបរម៉ូតូខាងលើ ស្លាប់នៅកន្លែងកើតហេតុ (មិនពាក់មួកសុវត្ថិភាព)។ ២ ឈ្មោះ សៀង វ៉ាន់ឌី ភេទ ប្រុស អាយុ ២៥ ឆ្នាំ ស្នាក់នៅភូមិ ឃុំ ជាមួយអ្នកបើកបរម៉ូតូខាងលើ(របួសស្រាល)(មិនពាក់មួកសុវត្ថិភាព) បានបុក គោយន្តកន្ត្រៃយ៍ក្នុងទឹសដៅស្របគ្នា អ្នកបើកបរគោយន្ត ឈ្មោះ ឆាន វិចិត្រ ភេទ ប្រុស អាយុ ១៨ ឆ្នាំ ស្នាក់នៅភូមិសង់ឃ្លាំង ឃុំតាំងក្រសាំង ស្រុកសន្ទុក ខេត្តកំពង់ធំ (រត់គេចខ្លួន)។

សមត្ថកិច្ចបញ្ជាក់ថា ករណីខាងលើនេះ កើតឡើងដោយសារមូលហេតុ គោយន្តកន្ត្រៃយ៍ បើកបត់ស្តាំខ្ជីខ្ជារខ្វះការប្រុងប្រយ័ត្ន រួមផ្សំនឹងអ្នកបើកបរម៉ូតូ បើកមានល្បឿនលឿន។

ក្រោយកើតហេតុសមត្ថកិច្ចជំនាញបញ្ជូជនរងគ្រោះទៅមន្ទីរពេទ្យ និងវាស់វែងធ្វើកំណត់ហេតុចងក្រងសំណុំរឿង និងប្រមូលវត្ថុតាំងយកទៅរក្សាទុកនៅអធិការដ្ឋាននគរបាលស្រុកសន្ទុក រង់ចាំភាគីសងខាងចូលខ្លួនមកដោះស្រាយគ្នាតាមច្បាប់ ៕ ប៊ុន រិទ្ធី