សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់ត្រូវបានសមត្ថកិច្ចឃាត់ខ្លួន បន្ទាប់ពីស្រវឹងស្រាជោកខ្លួន ទៅវាយបំផ្លាញទ្រព្យសម្បត្តិអ្នកដទៃ កាលពីវេលាម៉ោង៥រសៀល ថ្ងៃទី១៦ ខែវិច្ឆិកា ឆ្នាំ២០១៦ ស្ថិតក្នុងភូមិនារាទេន ឃុំឈើទាល ស្រុកស្វាយជ្រំ ខេត្តស្វាយរៀង ។
សមត្ថកិច្ចនគរបាលស្រុកបានឲ្យដឹងថា ជនសង្ស័យដែលសមត្ថកិច្ចឃាត់ខ្លួន ឈ្មោះយ៉ាន ចំរើន អាយុ២៦ឆ្នាំ មុខរបរកសិករ មានទីលំនៅភូមិ កើតហេតុខាងលើ ។ រីឯម្ចាស់រថយន្តរងគ្រោះ ឈ្មោះឌៀប ភេទប្រុស អាយុ២៦ឆ្នាំ មុខរបរកសិករ មានទីលំនៅភូមិថ្នា ឃុំគ្រួស ស្រុកស្វាយជ្រំ រីឯរថយន្តខូចខាត ម៉ាកសាំយ៉ុង ពណ៌ស ពាក់ស្លាកលេខ ភ្នំពេញ ២AD៤៧៧៤ ខូចខាតកញ្ចក់ផ្នែកខាងក្រោយយ៉ាងដំណំ។
តាមប្រជាពលរដ្ឋបានអោយដឹងថា មុនពេលកើតហេតុ គេឃើញបុរសម្នាក់ស្រវឹងស្រាជោក ហើយដើររេរាពេញផ្លូវ ខណៈនោះ ស្រាប់តែឃើញរថយន្តសាំយ៉ុងមួយគ្រឿង ដែលម្ចាស់ចតចោលមិនដឹងមានរឿងអ្វី ក៏បានស្ទុះវាយកញ្ចក់រថយន្តទាំងកំរោល បន្ទាប់ពីឃើញសកម្មភាពដូចនេះ ប្រជាពលរដ្ឋក៏បានរាយការណ៍មកសមត្ថកិច្ចឃាត់ខ្លួនតែម្ដង ។
បច្ចុប្បន្នជនសង្ស័យ ត្រូវបានសមត្ថកិច្ចកសាងសំណុំរឿងបញ្ជូនមកស្នងការនគរបាលខេត្តចាត់ការតាមច្បាប់ ៕ យឹម សុថាន
