សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ បុរសជនជាតិខ្មែរឥស្លាមម្នាក់ ជាកសិករក្នុងភូមិព្រៃឱម៉ាល់ ត្រូវបានឃាតករបាញ់ ៤គ្រាប់ ស្លាប់ភ្លាមៗនៅនឹងកន្លែងកើតហេតុយ៉ាងអាណោចអាធម ខណៈដែលជនរងគ្រោះកំពុងរៀបចំបញ្ចូលក្របីក្នុងក្រោល ដែលហេតុការណ៍នេះ បានកើតឡើងនៅវេលាម៉ោង ៤ និង៥៥នាទីល្ងាច ថ្ងៃទី១៩ ខែវិច្ឆិកា ឆ្នាំ២០១៦ នៅចំណុចបោសតាដុង ក្រោយផ្ទះជនរងគ្រោះ ស្ថិតក្នុងភូមិព្រៃឱម៉ាល់ សង្កាត់រលាប ក្រុងពោធិ៍សាត់ ខេត្តពោធិ៍សាត់។
ជនរងគ្រោះដែលត្រូវឃាតករបាញ់សម្លាប់ចំនួន ៤គ្រាប់ ខុស ០១គ្រាប់ និងត្រូវ ៣គ្រាប់នោះ មានឈ្មោះ សុះ ទា ភេទប្រុស អាយុ ៦៤ឆ្នាំ ជនជាតិខ្មែរឥស្លាម រស់នៅភូមិឃុំកើតហេតុខាងលើ។
ក្រោយមានការផ្ទះអាវុធចំនួន ៥គ្រាប់ ត្រូវបានប្រជាពលរដ្ឋនៅទីនោះ អះអាងថា ជាករណីគុំនំ ទើបបណ្តាលឲ្យមានករណីឃាតកម្មនេះកើតឡើង ដែលជនល្មើសប្រើអាវុធម៉ាក AK47។
សមត្ថកិច្ច កំពុងស្រាវជ្រាវយ៉ាងក្តៅគគុក ដើម្បីចាប់ខ្លួនឃាតករយកមកផ្តន្ទាទោសតាមផ្លូវច្បាប់ ដោយឡែកជនគ្រោះត្រូវបានសមត្ថកិច្ចប្រគល់ឲ្យក្រុមគ្រួសាររៀបចំធ្វើបុណ្យត ៕ ថាច់ យ៉ាត
