សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖មនុស្ស ស្រី ប្រុសចំនួន៥នាក់រួមនឹងថ្នាំញៀនត្រូវបានសមត្ថកិច្ច នគរបាលក្រុង ខេត្តសហការគ្នាចាប់ឃាត់ខ្លួនបានជាបន្តបន្ទាប់ក្នុងពេលធ្វើសកម្មភាពប្រើប្រាស់នឹងរក្សារទុកសារធាតុញៀននៅភុមិត្រពាំងបីសង្កាត់ផ្សាតឆ្នាំងក្រុងកំពង់ឆ្នាំង ដែលកិច្ចប្រតិបត្តិការបង្ក្រាបនេះ បានធ្វើឡើងនៅវេលម៉ោង៦និង៣០នាទីព្រឹក ថ្ងៃទី២០ ខែវិច្ឆិកា ឆ្នាំ២០១៦។
សមត្ថកិច្ចនគរបាលបានឲ្យដឹងថា ជនសង្ស័យទាំង៥នាក់ខាងលើ មាន១.ឈ្មោះឡា តារា អាយុ២៨ឆ្នាំ ២.ឈ្មោះក្រុង ឆេងលី ភេទស្រី អាយុ១៩ឆ្នាំ ៣.ឈ្មោះឡា ចន្នី អាយុ២១ឆ្នាំ ៤.ឈ្មោះជួប វឌ្ឍនៈ អាយុ១៦ឆ្នាំ និង៥.ឈ្មោះភី ចាន់ថន អាយុ១៨ឆ្នាំ ពួកគេទាំង៥នាក់ មានទីលំនៅភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង ។ ក្នុងពេលឃាត់ខ្លួនសមត្ថកិច្ច បានរកឃើញមាន ថ្នាំម៉ាទឹកកកចំនួន៥កញ្ចប់ ដាវ១ដើម កាំបិតចុងស្រួច១ ថង់ផ្លាស្ទិចសម្រាប់វេចខ្ចប់ថ្នាំញៀន១ដុំធំ និងឧបករណ៍ប្រើប្រាស់ថ្នាំញៀនមួយចំនួនទៀត ។
សមត្ថកិច្ចបានអោយដឹងថា ក្រោយប្រជាពលរដ្ឋនៅមូលដ្ឋាននេះ បានផ្តល់ព័ត៌ស្តីពីសកម្មភាពរបស់ក្រុមជនសង្ស័យ កម្លាំងសមត្ថកិច្ចបានសហការគ្នា រវាងកម្លាំងនគរបាលក្រុង និង កម្លាំងនគរបាលខេត្ត ចុះធ្វើការឡោមព័ទ្ធនិងបានឃាត់ខ្លួនជាបន្តបន្ទាប់ផងដែរ ។ ក្រុមទំាងនេះ គឺជាមុខសញ្ញាដែលសមត្ថកិច្ចតាមដានជាយូរណាស់មកហើយ ទើបតែពេលនេះ សមត្ថកិច្ចសហការជិតស្និតជាមួយប្រជាពលរដ្ឋទើបចាប់បាន ។
នៅពេលនេះ ជនសង្ស័យត្រូវបានកសាងសំណុំរឿងបញ្ជូនទៅតុលាការដើម្បីចាត់ការបន្តទៅតាមនីតិវិធី ៕ ចន្ថា
