សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសជាកម្មករសំណង់ម្នាក់ បានដេកល្លាប់ក្នុងបន្ទប់ខណៈមិនស្រួលខ្លួន សង្ងំដេក លុះព្រឹកឡើងទើបមិត្តភ័ក្រកម្មករដូចគ្នាប្រទះឃើញដាច់បាត់ទៅហើយបង្កការភ្ញាក់ផ្អើល កាលពីវេលាម៉ោង៦និង៣០នាទីព្រឹកថ្ងៃទី០២ ខែធ្នូ ឆ្នាំ២០១៦ នៅផ្ទះកើតហេតុភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ហើយរាយការណ៍ទៅអាជ្ញាធរ សមត្ថកិច្ចចុះមកជួយពិនិត្យជាក់ស្តែង ។
ជនរងគ្រោះ មានឈ្មោះ ប៉ុម វិត ភេទ ប្រុស អាយុ២៨ឆ្នាំ មុខរបរកម្មករសំណង់ ស្នាក់នៅ ភូមិថ្មគោល សង្កាត់ចោមចៅ ស្រុកកំណើតភូមិសុក្រំ ឃុំអូរសារាយ ស្រុកត្រាំកក់ ខេត្តតាកែវ ។ ជនរងគ្រោះមានឪពុកឈ្មោះ គង់ រាវ អាយុ ៤៨ឆ្នាំ មុខរបរ កសិករ ម្តាយឈ្មោះ សំ ហួន អាយុ៤៨ឆ្នាំ មុខរបរ កសិករ មានបងប្អូនចំនួន៦នាក់ ប្រុស២ ស្រី៤នាក់ ជនរងគ្រោះ ជាកូនច្បង ។
តាមសាច់ញាតិរបស់ជនរងគ្រោះ ដែលស្នាក់នៅក្នុងភូមិកើតហេតុ ជាមួយគ្នាបានឲ្យដឹងថា កាលពីព្រលប់ថ្ងៃទី០១ ខែធ្នូ ជនរងគ្រោះ ក្រោយពីបញ្ចប់ម៉ោងការងារ បានជិះម៉ូតូទៅរកហូបអ្វីនៅក្រៅរហូតដល់វេលាម៉ោង៧និង៣០នាទីយប់ ទើបត្រឡប់មកផ្ទះវិញ ឡើងទៅដេកនៅបន្ទប់ជាន់ទី១ ហើយក៏គ្មានអ្នកណាចាប់អារម្មណ៍ដែរ រហូតដល់ព្រឹកថ្ងៃទី០២ ខែធ្នូ មិនឃើញបងប្អូនងើប ហើយក៏មានសាច់ញាតិម្នាក់ទៀតឡើងទៅមើល ប្រទះឃើញជនរងគ្រោះដេកស្លាប់បាត់ទៅហើយ ។
ក្រោយកើតហេតុ សាកសពបន្ទាប់ពីនគរបាលឃំនាញពិនិត្យកោសល្យវិច័យរួចឃើញថា ស្លាប់ដោយជំងឺខ្យល់គរ ហើយប្រគល់ជូនក្រុមគ្រួសារ ដេកយកទៅធ្វើបុណ្យតាមប្រពៃណីឯស្រុកកំណើត ខណៈដែលសាច់ញាតិ ក៏មិនបានប្តឹងផ្តល់អ្វីដែរ ៕ សុខាសែនជ័យ
