សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ តៃកុងរថយន្តទំនងជាងងុយដេកពេលកំពុងបើកបរ បណ្តាលឲ្យរថយន្តរេចង្កូតទៅបុករះរបងផ្ទះប្រជាពលរដ្ឋក្រឡាប់ធ្វើឲ្យមនុស្ស៤នាក់រងរបួសធ្ងន់ស្រាល កាលពីវេលាម៉ោង៤ និង៣០នាទីព្រឹក ថ្ងៃទី១៦ ខែធ្នូ ឆ្នាំ២០១៦ លើកំណាត់ផ្លូវជាតិលេខ៦ ត្រង់ចំណុចចន្លោះគីឡូម៉ែត្រលេខ៣២-៣៣ ស្ថិតក្នុងភូមិសាមគ្គី ឃុំព្រែកដំបង ស្រុកមុខកំពូល ខេត្តកណ្តាល ។
មន្ត្រីនគរបាលចរាចរណ៍ស្រុកមុខកំពូលបានឲ្យដឹងថា រថយន្តធុនធំខ្នាតយក្សនោះម៉ាកហ៊ីយ៉ាន់ដាយ ពណ៌ក្រហម ពាក់ស្លាកលេខភ្នំពេញ 3D-1208 បើកបរដោយឈ្មោះ នង ងន់ឡែន ភេទប្រុស អាយុ26ឆ្នាំ (រងរបួសធ្ងន់) មានទីលំនៅភូមិអង្គួញដី ឃុំក្រឡា ស្រុកកំពង់សៀម ខេត្តកំពង់ចាម និងអ្នករួមដំណើរ៣នាក់ទៀត ទី១-ឈ្មោះ ធី ធឿន ភេទប្រុស អាយុ៤៨ឆ្នាំ (របួសស្រាល) ទី២-ឈ្មោះ ធឿន ថុន ភេទប្រុស អាយុ២១ឆ្នាំ (របួសស្រាល) ទាំង២នាក់មានទីលំនៅភូមិទួលវែង ឃុំក្រឡា ស្រុកកំពង់សៀម ខេត្តកំពង់ចាម និងទី៣-ឈ្មោះ រឿន ឡៃ ភេទប្រុស អាយុ៣០ឆ្នាំ មានទីលំនៅភូមិគមហា ឃុំវិហារគធំ ស្រុកកំពង់សៀម ។
ប្រភពដដែលបានបន្តថា នៅមុនពេលកើតហេតុសាក្សីបានឃើញរថយន្តម៉ាកហ៊ីយ៉ាន់ដាយ បើកបរតាមបណ្តោយផ្លូវជាតិលេខ៦ ក្នុងទិសដៅពីជើងទៅត្បូងដោយល្បឿនលឿន ខណៈបើកដល់ចំណុចកើតហេតុទំនងជាអ្នកបើកបរងងុយដេក ទើបបណ្តាលឲ្យរថយន្តរេចង្កូតទៅបុករះរបងផ្ទះប្រជាពលរដ្ឋ បណ្តាលឲ្យក្រឡប់ធ្វើឲ្យអ្នកបើកបររថយន្តនិងអ្នករួមដំណើររងរបួសធ្ងន់ស្រាលយ៉ាងដូច្នេះ ។
ក្រោយពីមានហេតុការណ៍កើតឡើងជនរងគ្រោះទាំង៤នាក់ ត្រូវបានរថយន្តសាមុយដឹកបញ្ជូនទៅសង្រ្គោះនៅមន្ទីរពេទ្យក្នុងរាជធានីភ្នំពេញ ។ ចំណែកឯរថយន្តត្រូវបានសមត្ថកិច្ចនគរបាលជំនាញចរាចរណ៍ស្រុកមុខកំពូល ធ្វើការវាស់វែងជួលរថយន្តស្ទូចនាំយកទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ ៕ស្អាងជ័យ
