សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់ត្រូវបានសមត្ថកិច្ចនគរបាលឃាត់ខ្លួន តាមពាក្យបណ្ដឹងរបស់ម្ដាយ ខណៈដែលម៉ួម៉ៅខឹងមិនចែកទ្រព្យសម្បត្តិឲ្យប៉ងសម្លាប់មួយគ្រួសារ ។
ការឃាត់ខ្លួន បានធ្វើឡើងកាលពីវេលារសៀលថ្ងៃទី២៦ ខែធ្នូ ឆ្នាំ២០១៦ ស្ថិតក្នុងភូមិបាយ៉ាប ឃុំបាសាក់ ស្រុកស្វាយជ្រំ ខេត្តស្វាយរៀង ។
សមត្ថកិច្ចនគរបាលស្រុកស្វាយជ្រំបានឲ្យដឹងថា ជនសង្ស័យមាន ឈ្មោះ សៅ ណន អាយុ២១ឆ្នាំ មុខរបរមិនពិតប្រាកដ មានទីលំនៅភូមិ ឃុំខាងលើ ។
រីឯស្ត្រីជាម្ដាយ ដែលបានដាក់ពាក្យប្តឹងមានឈ្មោះ សោម សារឿន អាយុ៥៩ឆ្នាំ មុខរបរកសិករ ។
សមត្ថកិច្ចនគរបាលបានបន្តថា មូលហេតុដោយសារតែជនសង្ស័យខឹងឪពុកម្ដាយមិនព្រមចែកទ្រព្យសម្បត្តិ ធ្វើឲ្យជនស្ស័យខឹងបានដាក់ថ្នាំបំពុលសត្វចូលក្នុងពាងទឹកប៉ុនប៉ុនសម្លាប់មួយគ្រួសារប៉ុន្តែត្រូវបានម្ដាយដឹង ក៏រាយការណ៍មកសមត្ថកិច្ចឃាត់ខ្លួនតែម្ដង។
តាមចម្លើយរបស់ជនសង្ស័យឈ្មោះ សៅ ណន បានសាភាពប្រាប់សមត្ថកិច្ចថា រូបគេពិតជាបានប្រព្រឹត្តសកម្មភាពខាងលើមែន ទើបសមត្ថកិច្ចនគរបាលបានកសាងសំណុំរឿងបញ្ជូនទៅស្នងការនគរបាលខេត្តចាត់ការបន្តតាមច្បាប់ ៕ យឹម សុថាន
