សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី៖ ជនសង្ស័យប្រុសស្រី៣នាក់ ត្រូវសមត្ថកិច្ចនគរបាលប៉ុស្តិ៍ឡាបានសៀក ឃាត់ខ្លួនកាលពីវេលាម៉ោង២ រសៀលថ្ងៃទី២៨ ខែធ្នូ ឆ្នាំ២០១៦។
យោងតាមរបាយការណ៍ពីនគរបាលប៉ុស្ថ៍ឡាបានសៀកបានឲ្យដឹងថា បានធ្វើការឃាត់ខ្លួនជនសង្ស័យប្រុសស្រី៣នាក់ជាប់ពាក់ព័ន្ធករណីជួញដូរ នឹងប្រើប្រាស់នូវសាធាតុញៀននៅចំណុចផ្ទះសំណាក់មិត្តភាពសំណាងល្អ ស្ថិតនៅភូមិ ថ្មី សង្កាត់ឡាបានសៀក ក្រុងបានលុង ខេត្តរតនគិរី។
ប្រភពបានបន្តថា ជនសង្ស័យទី១- ឈ្មោះ ពេជ្រ ដាវុធ ភេទ ប្រុស អាយុ ២៦ ឆ្នាំ ជនជាតិខ្មែរមុខរបរមិនពិតប្រាកដ ទី២- ឈ្មោះ ជា ចិត្ត ភេទប្រុស អាយុ២៩ ឆ្នាំជនជាតិខ្មែរមុខរបរមិនពិតប្រាកដ អ្នកទាំង២ មានទីលំនៅភូមិអូរកន្ទិល សង្កាត់បឹងកន្សែង ក្រុងបានលុង ទី៣- ឈ្មោះ ដូរ៉ាត់ កែវកន្និដា ភេទស្រី អាយុ២៨ ឆ្នាំជនជតិខ្មែរមុខរបរមិនពិតប្រាកដ មានទីលំនៅភូមិភ្នំស្វាយ សង្កាត់បឹងកន្សែង ក្រុងបានលុង ។
វត្ថុតាងដកហូតបាន ម្សៅក្រាមពណ៌សថ្លា (សង្ស័យជាសារធាតុញៀន)ចំនួន១ថង់ធំ នឹង២កញ្ចប់តូច ដប១ នឹងសម្ភារ:សម្រាប់ជក់គ្រឿងញៀនមួយចំនួនផងដែរ។
បច្ចុប្បន្ន នគរបាលប៉ុស្ថ៍ឡាបានសៀកកំពុងឃុំខ្លួន នឹងកសាងសំណុំរឿងបញ្ជូនទៅ សាលាដំបូងខេត្តនៅព្រឹកថ្ងៃទី២៩ ខែធ្នូ ឆ្នាំ២០១៦នេះ ចាត់ការតាមនិតិវិធីច្បាប់ ៕ វុទ្ធ ឦសាន
