សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោក ប៉ា សុជាតិវង្ស អភិបាលរាជធានីភ្នំពេញ នៅព្រឹកថ្ងៃទី៦ ខែមករា ឆ្នាំ២០១៦ បានប្រកាសបើកសម្ពោធដាក់ឲ្យប្រើប្រាស់ គម្រោងប្រឡាយគំរូ នៅប្រឡាយអូរបាក់ទូក និងផ្លូវ២ខ្សែអមសងខាងប្រឡាយ ប្រវែង២២០ម៉ែត្រ ស្ថិតក្នុងសង្កាត់ទួលសង្កែ ខណ្ឌប្ញស្សីកែវ តាមសំណូមពររបស់ប្រជា ពលរដ្ឋមូលដ្ឋាន រាល់ឆ្នាំតែងតែ លិចលុង ដោយជំនន់ទឹកភ្លៀង ខណៈប្រឡាយមួយនេះ មិនទាន់ មានការកែលម្អ ពីអាជ្ញាធរ ។
លោក ប៉ា សុជាតិវង្ស បានបញ្ជាក់ថា ៖ ការប្រកាសបើកនេះ គឺដើម្បីជម្រាបប្រាប់ប្រជាពលរដ្ឋ ឲ្យបានឃើញនូវគម្រោងនេះផ្ទាល់ ក៏ដូចជាធ្វើតាមសំណូមពររបស់ប្រជាពលរដ្ឋ ក្នុងការចូលរួមសហការទាំង អស់ គ្នា ចំពោះគម្រោងអភិវឌ្ឍន៍ដ៏មានសារសំខាន់ ណាស់ ក្នុងការរំដោះទឹកជំនន់ នៅភាគខាងជើងរាជធានី ។
រដ្ឋបាលរាជធានីភ្នំពេញ ធ្វើការស្ដារនិងរៀបចំប្រឡាយនេះ ជាមុនសិន ក្រោយមកនឹងមានការស្ថាបនាផ្លូវចំនួន ២ខ្សែទៀត អមសមសងខាងប្រឡាយ ថែមទៀត។ តាមគម្រោងរបស់សាលារាជធានី ប្រឡាអូបាក់ទូកនេះ និងគ្រោង ធ្វើការ ស្ថាប់នា ឲ្យរួចរាល់នៅ ឆ្នាំ២០១៧ បន្ទាប់ពីដោះស្រាយ រាល់សំណង ផលប៉ះពាល់ ប្រជាពលរដ្ឋ ទៅលើការដ្ឋានទាំផ្លូវ និងប្រឡាយ នេះផងដែរ ។ តាមការចំណាយទៅលើការដ្ឋានទាំងផ្លូវ និងប្រឡាយ អស់ប្រមាណ ជាង ១០លានដុល្លារ អាមេរិក ។ ប្រឡាយអូបាក់ទូកនេះ មានប្រវែងប្រមាណជាង ១០ គីឡូម៉ែត្រ ចាប់ពីស្ថានីយ បូមទឹកទួកគោកទី២ ដល់ស្ថានីយបូមទឹកគីឡូម៉ែត្រលេខ ១០ ឬស្សីកែវ ។
លោកអភិបាលរាជធានី ក៏បានស្នើយ៉ាងទទូចដល់ប្រជាពលរដ្ឋ មិនត្រូវយកសំរាមទៅចោលក្នុងប្រឡាយតទៅទៀត ដើម្បីចូលរួមថែរក្សាបរិស្ថាន និងខ្យល់អាកាសសម្រាប់ សុខភាព ក៏ដូចជាការពារការកកស្ទះក្នុងប្រឡាយជាដើម។
ជាមួយគ្នានេះ លោកក៏បានអំពានាវដល់ប្រជាពលរដ្ឋ ដែលបានចុះឈ្មោះបោះឆ្នោត សូមទៅពិនិត្យឈ្មោះរបស់ខ្លួន ក្នុងបញ្ជីឈ្មោះបោះឆ្នោតដំបូង នៅតាមសាលា សង្កាត់ ឲ្យបានគ្រប់គ្នាផងដែរ៕ សំរិត
