សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាលៈ បុរសម្នាក់មិនសូវកាក់កបនឹងការងារសំណង់បានលួចធ្វើសកម្មភាពជួញដូរគ្រឿងញៀនខុសច្បាប់ ក៏ត្រូវសមត្ថកិច្ចនគរបាលស្រុកអង្គស្នួលចាប់ខ្លួន កាលពីវេលាម៉ោង២០ និង៣០នាទី ថ្ងៃទី១៩ ខែមករា ឆ្នាំ២០១៧ នៅលើកំណាត់ផ្លូវលំ ស្ថិតក្នុងភូមិត្រពាំងសុក្រម ឃុំបែកចាន ស្រុកអង្គស្នួល ខេត្តកណ្តាល ។
មន្ត្រីនគរបាលស្រុកអង្គស្នួលបានឲ្យដឹងថា ជនល្មើសដែលត្រូវបានចាប់ខ្លួននោះឈ្មោះ ប៉ែន ទីណា ភេទប្រុស អាយុ២៩ឆ្នាំ ជនជាតិខ្មែរ មុខរបរ កម្មករសំណង់ បច្ចុប្បន្នស្នាក់នៅម្តុំផ្សារកាណាឌីយ៉ា ស្ថិតក្នុងភូមិត្រពាំងខ្លឹង សង្កាត់ចោមចៅ ខណ្ឌពោធិ៍សែន ។ ក្នុងប្រតិបត្តិការបង្រ្កាបចាប់ខ្លួនជនល្មើសខាងលើនេះ សមត្ថកិច្ចបានធ្វើការដកហូត ថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន២កញ្ចប់ធំ-១កញ្ចប់តូច និងទូរស័ព្ទដៃមួយគ្រឿងផងដែរ។
ប្រភពដដែលបានបន្តថា ជនល្មើសខាងលើនេះជាមុខសញ្ញាក្រៅមូលដ្ឋានដែលសមត្ថកិច្ចនគរបាលស្រុកអង្គស្នួលកំណត់និងតាមដាននាពេលកន្លងមក ដោយសារតែជនល្មើសរូបនេះឧស្សាហ៏ចូលមកធ្វើសកម្មភាពជួញដូរគ្រឿងញៀននៅក្នុងមូលដ្ឋានឃុំបែនចាន ។ នៅល្ងាចថ្ងៃទី១៩ ខែមករា ឆ្នាំ២០១៧ សមត្ថកិច្ចនគរបាលក្តាប់បានព័ត៌មានថា ជនល្មើសរូបនេះយកថ្នាំញៀនមកធ្វើសកម្មភាពជួញដូរនៅក្នុងមូលដ្ឋានឃុំបែកចានបន្តទៀត ទើបសមត្ថកិច្ចចាំឃ្លាំមើលរហូតឈានដល់បង្រ្កាបចាប់ខ្លួនរួមជាមួយវត្ថុតាងជាក់ស្តែងតែម្តង ។
ជនល្មើស ប៉ែន ទីណា បានសារភាពប្រាប់សមត្ថកិច្ចនគរបាលថា ឆ្លៀតពេលទំនេពីការងារសំណង់រូបគេតែងតែទៅទិញគ្រឿងញៀនពីមេក្លោងមិនស្គាល់អត្តសញ្ញាណនៅម្តុំពេទ្យលោកសង្ឃ ដើម្បីយកមកជួញដូរបន្តនៅឃុំបែកចានស្រុកអង្គស្នួល ។ ជាក់ស្តែងនៅថ្ងៃទី១៩ ខែមករា ឆ្នាំ២០១៧ រូបគេបានទៅទិញគ្រឿងញៀនពីមេក្លោងចំនួន០៣កញ្ចប់ ដើម្បីយកទៅជួញដូរបន្តក្នុងតម្លៃ២២០ដុល្លារសហរដ្ឋអាមេរិក ខណៈកំពុងបម្រុងធ្វើសកម្មភាពក៏ត្រូវបានសមត្ថកិច្ចចាប់ខ្លួនតែម្តង ៕ស្អាងជ័យ
