សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ កម្លាំងនគរបាលស្រុក ប៉ុស្ដិ៍ សហការគ្នាព័ទចាប់ជនសង្ស័យប្រើប្រាស់ ជួញដូរដោយខុសច្បាប់នូវសារធាតុញៀនចំនួន ០២នាក់ រួមទាំងវត្ថុតាង និងសម្ភារ ។
ប្រតិបត្តិការនេះអនុវត្តឡើងកាលពីវេលាម៉ោង ៩និង១០នាទីយប់ ថ្ងៃទី២០ ខែមករា ឆ្នាំ២០១៧ ត្រង់ចំណុចក្បាលស្ពានថ្មខាងលើ ស្ថិតក្នុងភូមិកប៉ាស់ ឃុំឈើតុំ ស្រុកក្រគរ ខេត្តពោធិ៍សាត់ ។
នគរបាលស្រុកក្រគរបានឱ្យដឹងថា ក្នុងកិច្ចប្រតិបត្តិការខាងលើ កម្លាំងធ្វើការបង្រ្កាបនិងឃាត់ខ្លួនជនសង្ស័យមុខសញ្ញាប្រើប្រាស់ ជួញដូរដោយខុសច្បាប់នូវសារធាតុញៀនចំនួន ០២នាក់រួមទាំងវត្ថុតាង និងសម្ភារយកទៅនគរបាលប៉ុស្ដិ៍រដ្ឋបាលឈើតុំ ដើម្បីសាកសួរ និងបំពេញនីតិវិធី។ ប្រភពពីនគរបាលខាងលើបន្តថា ជនសង្ស័យត្រូវបានឃាត់ខ្លួន ទី១-ឈ្មោះឯល អៀង ភេទប្រុស ២៨ឆ្នាំ រស់នៅភូមិ-ឃុំខាងលើ និងទី២- ឈ្មោះ ឈឹម សំណាង ភេទប្រុស អាយុ ២៧ឆ្នាំ រស់នៅភូមិអូរស្ដៅ សង្កាត់ផ្ទះព្រៃ ក្រុង-ខេត្តពោធិ៍សាត់ ក្នុងកិច្ចប្រតិបត្តិការបង្រ្កាបមុខសញ្ញា ប្រើប្រាស់ ជួញដូរដោយខុសច្បាប់នូវសារធាតុញៀន កម្លាំងដកហូតវត្ថុតាង និងសម្ភាររួមមាន ម្សៅក្រាមពណ៌សថ្លាសង្ស័យជាសារធាតុញៀនចំនួន ៣កញ្ចប់ តូច ១កញ្ចប់ ថង់សម្រាប់ច្រកមួយចំនួនធំ ទូរស័ព្ទដៃចំនួន ២គ្រឿង ដែកកេះចំនួន ២ ម៉ូតូចំនួន ២គ្រឿង ធំ ១គ្រឿង។
ប្រភពដដែលបន្តទៀតថា ចំពោះជនសង្ស័យ រួមទាំងវត្ថុតាង ត្រូវបានឃាត់និងដកហូតជាបណ្ដោះអាសន្ន កម្លាំងបានបំពេញសំណុំឯកសារបញ្ជូនទៅការិយាល័យជំនាញ នៃស្នងការដ្ឋាននគរបាលខេត្ត ដើម្បីបន្តតាមនីតិវិធី៕ ប៉ឹម ពិន
