សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ស្រ្តីម្នាក់បានរងរបួសធ្ងន់ សន្លាប់ស្តូកស្តឹងហើយត្រូវរថយន្តសាម៊ុយមកដឹកទៅសង្គ្រោះនៅមន្ទីរពេទ្យភ្លាមៗ ខណៈកំពុងជិះម៉ូតូតាមផ្លូវ ហើយត្រូវក្រុមចោរធ្វើសកម្មភាពឆក់កាបូបស្ពាយមិនបានសម្រេច ។
ហេតុការណ៍នេះ បានកើតឡើងកាលពីវេលាម៉ោង៥និង៤៥នាទីល្ងាច ថ្ងៃទី២៣ ខែមករា ឆ្នាំ២០១៧ តាមបណ្តោយផ្លូវសហព័ន្ធរុស្សី ស្ថិតក្នុងក្រុម៤ ភូមិសេប៉េសេ សង្កាត់ទឹកថ្លា ខណ្ឌសែនសុខ។
ស្រ្តីរងគ្រោះមានឈ្មោះ ជិន សេដ្ឋា អាយុ៤៥ឆ្នាំ មុខរបរធ្វើគ្រួបង្រៀន ផ្នែកសំអាងការក្នុងអង្គការមិត្តសម្លាញ់ ស្ថិតនៅខាងក្រោយវត្តឧណ្ណាលោម ខណ្ឌដូនពេញ និងស្នាក់នៅភូមិចំការឪឡឹក សង្កាត់កាកាប ខណ្ឌពោធិ៍សែនជ័យ ។
ប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេឃើញស្ត្រីរងគ្រោះបានជិះម៉ូតូ១គ្រឿងម៉ាកស្មាស់វី ពណ៌ខ្មៅ ពាក់ស្លាកលេខ ភ្នំពេញ 1DC3966 តែម្នាក់ឯង តាមបណ្តោយផ្លូវសហព័ន្ធរុស្សីក្នុងទិសដៅពីកើតទៅលិច លុះមកដល់ចំណុចកើតហេតុ ស្រាប់តែលេចមុខជនសង្ស័យមានគ្នា២នាក់បានជិះម៉ូតូ១គ្រឿង ម៉ាកស៊ុយសុីគីនិច ពណ៌ក្រហម មិនចាំស្លាកលេខ ជិះមកពីក្រោយបានធ្វើសកម្មភាពឆក់យកកាបូបស្ពាយពីស្ត្រីរងគ្រោះ ប៉ុន្តែមិនបានសម្រេចបណ្តាលអោយស្ត្រីគ្រោះដួលបោកក្បាលទៅនឹងថ្នល់រងរបួសធ្ងន់តែម្តង ហើយក្រុមជនសង្ស័យបានជិះគេចខ្លួនបាត់។
សមត្ថកិច្ចបានអោយដឹងថា នៅក្នុងកាបូបស្ពាយរបស់ស្ត្រីរងគ្រោះដែលក្រុមចោរឆក់មិនបានសម្រេចនោះមានដូចជាទូរស័ព្ទដៃម៉ាកអាហ្វូនសិចផ្លើស១គ្រឿង អត្តសញ្ញាណបណ្ណ១សន្លឹក និងប្រាក់មួយចំនួន។
ក្រោយកើតហេតុគេឃើញមានសមត្ថកិច្ចបានចុះមកដល់កន្លែងកើតហេតុបានទាក់ទងហៅរថយន្តសាម៊ុយមកដឹកស្ត្រីរងគ្រោះទៅសង្គ្រោះនៅមន្ទីរពេទ្យព្រះកុសុមៈ(ពេទ្យលោកសង្ឃ)ដើម្បីជួយសង្គ្រោះ ចំណែកម៉ូតូស្ត្រីរងគ្រោះត្រូវសមត្ថកិច្ចយកទៅរក្សាទុកនៅប៉ុស្តិ៍នគរបាលទឹកថ្លារង់ចាំសាច់ញាតិមកយកទៅវិញ។
គួររំលឹកផងដែរថា កន្លងមកក្រុមជនសង្ស័យតែងតែធ្វើសកម្មភាពឆក់កាបូបឆក់ខ្សែក និងលួចយកកាបូបលុយនៅក្នុងរថយន្តដែលអ្នកដំណើរឈប់ទិញផ្កាតាមបណ្តោយផ្លូវសហព័ន្ធរុស្សីនេះជាញិកញាប់បង្កភាពអសន្តិសុខដល់សង្គមហើយធ្វើអោយប្រជាពលរដ្ឋមានការភ័យខ្លាចពីសុវតិ្ថភាពពេលធ្វើដំណើរតាមផ្លូវសហព័ន្ធរុស្សីនេះដូច្នេះ សូមលោក ម៉ក់ ហុង អធិការខណ្ឌ មេត្តាជួយពិនិត្យ មើលមន្ត្រីក្រោមឱវាទផង ជាពិសេសលោក សុខ សុផល នាយប៉ុស្តិ៍ទឹកថ្លាតែម្តង។ ព្រោះបទល្មើសឆក់នេះកើតមានច្រើនណាស់៕ តុង សីហា
