សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ដោយសារតែគ្រឿងស្រវឹង បានធ្វើឲ្យបុរសម្នាក់រងរបួសធ្ងន់និងរថយន្ត២គ្រឿងទៀតខូចខាតយ៉ាងដំណំ ខណៈដែរបុរសម្នាក់បើកបររថយន្តក្នុងស្ថានភាពស្រវឹងស្រាជោគជាំ ជ្រុលទៅបុកអ្នកជិះកង់និងរថយន្ត១គ្រឿង កាលពីវេលាម៉ោង៧និង១០នាទីយប់ថ្ងៃទី២៣ ខែមករា ឆ្នាំ២០១៧ នៅចំណុចផ្លូវព្រះនរោត្តម កែងផ្លូវលេខ២២២ ភូមិទី៣ សង្កាត់ជ័យជំនះ ខណ្ឌដូនពេញ ។
តាមប្រភពព័ត៌មានពីមន្រ្តីនគរបាលចរាចរណ៍ខណ្ឌដូនពេញ បានឲ្យដឹងថា រថយន្តបង្កហេតុម៉ាកកាមរី បាឡែន ពណ៍ទឹកប្រាក់ ពាក់ស្លាកលេខភ្នំពេញ2AI-9365 បើកបរដោយបុរសម្នាក់ឈ្មោះជា ហ៊ុយ អាយុ៤២ឆ្នាំ. ស្នាក់នៅភូមិចុងបឹង ឃុំផ្ទះកណ្ដាល ស្រុកស្រីសន្ធរ ខេត្តកំពង់ចាម ។រីឯជនរងគ្រោះដែលជិះកង់ឈ្មោះសារី រ៉ាម៉ុន ភេទប្រុស អាយុ២៤ឆ្នាំ មុខរបរកម្មករ ស្នាក់នៅភូមិទី២ សង្កាត់-ខណ្ឌជ្រាយចង្វា(រងរបួសធ្ងន់កំពុងសម្រាកព្យាបាលនៅមន្ទីរពេទ្យកាល់ម៉ែត) ។និងអ្នកបើកបរឡង់រីវើល ពណ៍ខ្មៅ ពាក់ស្លាកលេខភ្នំពេញ 2A-6566 ឈ្មោះលី សុវណ្ណគីរី ភេទប្រុស អាយុ៤៨ឆ្នាំ មុខរបរលក់ដូរ ស្នាក់នៅផ្ទះលេខ៥៥៨ ផ្លូវលេខ៣៥៧ សង្កាត់ច្បារអំពៅទី២ ខណ្ឌច្បារអំពៅ ។
ប្រភពដដែរ បានបន្តទៀតថា នៅមុខពេលកើតហេតុ គេឃើញរថយន្តបង្កហេតុនិងកង់រួមទាំងរថយន្តឡង់រីវើ បានធ្វើដំណើរស្របទិសគ្នា ក្នុងទិសដៅពីជើងទៅត្បូង លុះបើកមកដល់ចំណុចកើតហេតុ ដោយសារម្ចាស់រថយន្តបង្កម៉ាកកាមរីបាឡែនស្រវឹងស្រាបានជ្រុកចង្កូតទៅបុកពីក្រោយយ៉ាងពេញទំហឹង បណ្ដាលឲ្យអ្នកជិះកង់រងរបួសធ្ងន់តែម្ដង ។
ក្រោយកើតហេតុជនរងគ្រោះត្រូវបានសមត្ថកិច្ចដឹកបញ្ចូនទៅសង្រោះនៅមន្ទីរពេទ្យកាល់ម៉ែត ចំណែកឯរថយន្តបង្កនិងកង់រួមនិងរថយន្តរងគ្រោះត្រូវបានសមត្ថកិច្ចអូសយកមករក្សាទុកនៅនគរបាលចរាចរណ៍ជើងគោករាជធានីភ្នំពេញដោះស្រាយតាមច្បាប់ ៕ ស តារា
