សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី៖ មានករណីគ្រោះថ្នាក់ចរាចរណ៍ រវាងរថយន្តបុកម៉ូតូជិះបញ្ច្រាសទិសគ្នា បណ្តាលឲ្យមនុស្ស២នាក់ប្តីប្រពន្ធរងរបួសធ្ងន់ និងស្រាល។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង២និង៣០នាទីរសៀល ថ្ងៃទី៣០ ខែមករា ឆ្នាំ២០១៧ នៅត្រង់ចំណុចចំការឈ្មោះ ហឿង តាមបណ្តោយផ្លូវជាតិលេខ៧៨ ស្ថិតនៅភូមិទូយ ឃុំទីចាក់ ស្រុកបកែវ ខេត្តរតនគិរី។
នគរបាលស្រុកបកែវបានឲ្យដឹងថា រវាងរថយន្ដ១គ្រឿង ម៉ាក Lexus 450 ពណ៌ស្ករ ពាក់ស្លាកលេខ ភ្នំពេញ 2F 2006 បើកបរក្នុងទិសដៅពីកើតទៅលិចក្នុងល្បឿនលឿនជ្រុលទៅបុក ម៉ូតូ១គ្រឿង ម៉ាក Dream C125 ពណ៌ខ្មៅ ពាក់ស្លាកលេខ ក្រចេះ 1B 2534 ជិះ២នាក់ប្តីប្រពន្ធ ក្នុងទិសដៅបញ្ច្រសគ្នា។
ប្រភពបានបន្តទៀតថា ជនរងគ្រោះ ឈ្មោះ វ៉ែន ឆុច ភេទប្រុស អាយុ ៣២ឆ្នាំជនជាតិខ្មែរ ត្រូវជាប្ដី រងរបួសធ្ងន់ នឹង ឈ្មោះ ហឹម រ៉ុន ភេទស្រី អាយុ ៣០ឆ្នាំជនជាតិខ្មែរ ត្រូវជាប្រពន្ធ រងរបួសស្រាលអ្នកទាំង២ ត្រូវបានសមត្ថកិច្ច បញ្ជូនទៅមណ្ឌលសុខភាពស្រុកបកែវ អ្នកទាំងពីរមានទីលំនៅបច្ចុប្បន្នភូមិ អុល ឃុំ ប៉ាតាង ស្រុកលំផាត់ រតនគិរី។
ចំណែកអ្នកបើកបររថយន្តបង្កក្រោយពីកើតហេតុចុះរត់គេចខ្លួនបាត់ស្រមោល បន្សល់ទុករថយន្តនៅនឹងកន្លែងកើតហេតុ។
ក្រោយកើតហេតុុនគរបាលមូលដ្ឋានចុះមកធ្វើអន្តរាគមន៍ហើយវាស់វែងយករថយន្ដនិងម៉ូតូទៅរក្សាទុកនៅប៉ុស្ដិ៍ឃុំទីងចាក់ដើម្បីរងចាំធ្វើការ ដោះស្រាយគ្នាជាក្រោយ ៕ វុទ្ធឦសាន
