សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ បុរសម្នាក់ក្នុងចំណោមបក្ខពួកចំនួន ៤នាក់ ត្រូវបានកំលាំងជំនាញអធិការដ្ឋាននគរបាលស្រុកក្រគរ សហការជាមួយកំលាំងប៉ុស្តិ៍នគរបាលរដ្ឋបាលកំពង់ពោធិ៍ ឃាត់ខ្លួនក្រោយទទួលពាក្យបណ្ដឹងរបស់នារីរងគ្រោះ ក្នុងករណីចាប់រំលោភបូកនៅវាលស្រែ។
ប្រតិបត្តិការខាងលើអនុវត្តន៍ឡើងកាលពីវេលាម៉ោង១២ថ្ងៃត្រង់ ថ្ងៃទី៣០ ខែមករា ឆ្នាំ២០១៧ នៅចំណុចផ្ទះជនសង្ស័យ ស្ថិតក្នុងភូមិមាត់ព្រៃ ឃុំកំពង់ពោធិ៍ ស្រុកក្រគរ ខេត្តពោធិ៍សាត់។
ប្រភពព័ត៌មានពីកម្លាំងចុះអនុវត្តន៍បានឲ្យដឹងថា ជនសង្ស័យត្រូវបានកម្លាំងឃាត់ខ្លួនឈ្មោះ ផល ភីន (ហៅជ័យ) ភេទប្រុស អាយុ ១៩ឆ្នាំ បច្ចុប្បន្នរស់នៅភូមិមាត់ព្រៃ ឃុំកំពង់ពោធិ៍ ស្រុកក្រគរ ខេត្តពោធិ៍សាត់។
ប្រភពខាងលើបន្តថា ការដែលកម្លាំងឃាត់ខ្លួនជនសង្ស័យរូបនេះ ធ្វើឡើងក្រោយពីទទួលពាក្យបណ្ដឹង១ច្បាប់ កាលពីវេលាម៉ោង១៨និង៣០នាទី ថ្ងៃទី២៩ ខែមករា ឆ្នាំ២០១៧ របស់នារីម្នាក់ឈ្មោះ ស សម អាយុ ១៧ឆ្នាំ បច្ចុប្បន្នរស់នៅភូមិកំពង់ឡ ឃុំកំពង់ពោធិ៍ ស្រុកក្រគរ ខេត្តពោធិ៍សាត់ នៅក្នុងពាក្យបណ្ដឹងនោះបានប្តឹងឈ្មោះ ភីន(ហៅជ័យ)ឈ្មោះ ជ្រុញ អ្នកទាំង២នាក់នេះ រស់នៅភូមិមាត់ព្រៃ ឃុំកំពង់ពោធិ៍ ស្រុកក្រគរ និងបក្ខពួក ២នាក់ផ្សេងទៀត មិនសា្គល់អតសញ្ញាណថាបានចាប់រំលោភ ។
ក្នុងពាក្យបណ្ដឹងបានរៀបរាប់បន្តថា កាលពីពាក់កណ្ដាលអធ្រាត្រ ថ្ងៃទី២៦ ខែមករា ឆ្នាំ២០១៧ ប៉ុន្មានថ្ងៃមុននេះ មានកម្មវិធីរាំធុងបាស់មួយនៅក្នុងភូមិមាត់ព្រៃ ឃុំកំពង់ពោធិ៍ លុះចប់កម្មវិធីខ្លួនបានដើរត្រឡប់មកផ្ទះវិញ ប៉ុន្តែត្រូវបានឈ្មោះ ផល ភីន ហៅជ័យ ចាប់រំលោភបានសម្រេចចំនួន ១លើក ព្រមទាំងបក្ខពួកឈ្មោះ ជ្រុញ និង ២នាក់ ផ្សេងទៀតមិនស្គាល់អតសញ្ញាណ មកព្រួតគ្នាចាប់បម្រុងរំលោភបូក តែសំណាងនាងប្រឹងរើបម្រាស់ផងស្រែកឮៗឲ្យគេជួយ ទើបរួចផុតពីបញ្ហាខាងលើនេះ លុះថ្ងៃបន្ទាប់មកទៀត ឈ្មោះ ភីន និងបក្ខពួកបានគំរាមជាបន្តបន្ទាប់មិនឲ្យប្តឹងផ្តល់ ពុំដូច្នេះទេ ពួកគេនឹងសម្លាប់នាងចោលជាក់ជាមិនខាន ប៉ុន្តែក្នុងពាក្យបណ្តឹងនាងពុំបានទៀមទារសំណងថ្លៃជំងឺចិត្តអ្វីនោះទេ គឺសុំឲ្យសមត្ថកិច្ចអនុវត្តតាមនីតិវិធីចុះ។
ប្រភពដដែលអះអាងបន្តទៀតថា ចំពោះជនសង្ស័យត្រូវបានកម្លាំងឃាត់ខ្លួនយកមកសួរនាំបានឆ្លើយសារភាពនៅមុខសមត្ថកិច្ចថា ខ្លួនពិតជាបានរួមភេទជាមួយនាងបានសម្រេចចំនួន ១លើកពិតប្រាកដមែន ។ ករណីខាងលើនេះ នគរបាលជំនាញស្រុកក្រគរ កំពុងរាបចំសំណុំឯកសារពាក់ព័ន្ធបញ្ជូនខ្លួនជនសង្ស័យ ទៅការិយាល័យជំនាញ នៃស្នងការដ្ឋាននគរបាលខេត្តអនុវត្តន៍បន្តនៅរសៀល ថ្ងៃទី៣១ ខែមករា ឆ្នាំ២០១៧ ៕ ប៉ឹម ពិន
