សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ ចោរអស់លក្ខណ៍ម្នាក់ បានធ្វើសកម្មភាពលួចម៉ូតូរ៉ឺម៉កដឹកស្មៅបានហើយ ជិះរត់ តែត្រូវម្ចាស់តាមទាន់ បានស្រែកអោយប្រជាពលរដ្ឋនាំគ្នាចាប់បានហើយវាយម្នាក់មួយដៃមួយជើងឡើងទ្រមខ្លួន ទើបប្រគល់អោយសមត្ថកិច្ចប៉ុស្តិ៍ភ្នំពេញថ្មី ។
ហេតុការណ៍នេះ បានកើតឡើងកាលពីម៉ោង០៩និង៣០នាទីព្រឹកថ្ងៃទី០៨ ខែកុម្ភៈ ឆ្នាំ២០១៧ នៅចំណុចផ្លូលំ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
សមត្ថកិច្ចបានអោយដឹងថា ជនសង្ស័យមានឈ្មោះ ស្រៀង គឹមស្រ៊ន់ ភេទប្រុសអាយុ៣៦ឆ្នាំ មុខរបរមិនពិតប្រាកដ ស្នាក់នៅភូមិផ្សារតូច សង្កាត់ទួលសង្កែ ខណ្ឌឫស្សីកែវ និងមានស្រុកកំណើតភូមិក្រូចសើច ឃុំពុកឫស្សី ស្រុកខ្សាច់កណ្តាល ខេត្តកណ្តាល។
ចំណែកជនរងគ្រោះជាម្ចាស់ម៉ូតូមានឈ្មោះសោរ គង់ ភេទប្រុស អាយុ៤៦ឆ្នាំមុខរបរដើរច្រូតស្មៅលក់ ស្នាក់នៅបន្ទប់ជួល ភូមិភ្នំពេញថ្មី សង្កាត់ភ្នំពេញថ្មីខណ្ឌសែនសុខ និងមានស្រុកកំណើតភូមិគោកចក ឃុំគោកចក ស្រុកកំពង់ត្របែកខេត្តព្រៃវែង ។
ប្រភពពីជនរងគ្រោះបានអោយដឹងថា នៅមុនកើតហេតុគាត់បានបើកម៉ូតូចាស់អូសរ៉ឺម៉កទៅច្រូតស្មៅជាមួយប្រពន្ធ និងកូននៅក្នុងបរិវេណវត្តវង្គត់បូរី ស្ថិតនៅសង្កាត់ទឹកថ្លា ពេលនោះក៏ចេញច្រូតតាមមុខរៀងៗខ្លួនដោយទុកម៉ូតូអូសរ៉ឺម៉កចោល ខណៈច្រូតស្មៅជិតពេញរ៉ឺម៉កទៅហើយស្រាប់តែបាត់ម៉ូតូអូសរ៉ឺម៉កពេលនោះគាត់បានសួរអ្នកនៅក្បែនោះហើយបានប្រាប់ថា មានបុរសម្នាក់បើកចេញទៅមុននេះបន្តិចពេលនោះកូនប្រុសគាត់បានហៅម៉ូតូឌុបជិះតាមរក។
ប្រភពដដែលបន្តទៀតថា ក្រោយពីតាមរហូតមកដល់ចំណុចខាងលើ ក៏ជួបជនសង្ស័យកំពុងដោះកន្ទុយរ៉ឺម៉កចេញ បម្រុងយកតែម៉ូតូ ឃើញដូចនោះ ក៏ស្រែកអោយប្រជាពលរដ្ឋនៅក្បែរនោះជួយ អន្តរាគមន៍ និងចាប់ខ្លួនបានហើយក៏ស្វាគមន៍មួយដៃមួយជើង ទើបប្រគល់អោយសមត្ថកិច្ចប៉ុស្តិ៍ភ្នំពេញថ្មីសាកសួរបន្ត។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានធ្វើសកម្មភាពលួចម៉ូតូអូសរ៉ឺម៉កខាងលើពិតប្រាកដមែន ហើយនៅក្នុងកាបូបជនសង្ស័សមត្ថកិច្ចដកហូតសម្ភារៈល្មើសមួយចំបួនធំផងដែរ ។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ចាត់ការបន្តតាមនីតិវិធី៕ តុង សីហា
