សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុ បន្ទាប់ពីរថយន្តសាំយ៉ុងមួយគ្រឿងបានបើកបុកពេញមួយទំហឹង ។ ហេតុការណ៍នេះ កើតឡើងកាលពីវេលាម៉ោង៨យប់ថ្ងៃទី៩ ខែកុម្ភៈ ឆ្នាំ២០១៧ នៅលើកំណាត់ផ្លូវជាតិលេខ៥ ចន្ឡោះបង្គោលគីឡូម៉ែត្រលេខ៩៣ និងលេខ៩៤ ត្រង់ចំណុចផ្លូវកោង ក្នុងភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ។
សមត្ថកិច្ចនគរបាលចរាចរណ៍បានឲ្យដឹងថា ជនរងគ្រោះឈ្មោះងន ចាន់ឌៀរ ភេទប្រុស អាយុ៣៦ឆ្នាំ មានទីលំនៅក្នុងភូមិស្វាយជ្រុំថ្មី ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ជិះម៉ូតូម៉ាកយ៉ាម៉ាហា ស៊ីព្រុស គ្មានស្លាកលេខ ។ ចំណែកឯករថយន្តបង្ក ម៉ាក សាំយ៉ុង ពាក់ស្លាកលេខ កំពង់ឆ្នាំង ២A-០១៧១។
សមត្ថកិច្ចបានអោយដឹងថា នៅមុនពេលកើតហេតុ ជនជនរងគ្រោះជិះម៉ូតូរបស់ខ្លួនសណ្តោងរ៉ឺម៉កពីក្រោយ ក្នុងទិសដៅពីលិចទៅកើត នៅពេលមកដល់ចំណុចកើតហេតុ ស្រាប់តែរថយន្តបង្កខាងលើ ដែលបើកក្នុងទិសដៅផ្ទុយគ្នា បានបើកជែងរថយន្តនៅខាងមុខ ក៏ជ្រុលចង្កូតទៅបុកម៉ូតូជនរងគ្រោះពេញមួយទំហឹង បណ្តាលអោយសា្លប់នៅនឹងកន្លែងតែម្តង ។ ចំណែកឯអ្នកបើកបររថយន្តបានបើកគេចខ្លួនបាត់ស្រមោល ។
ចំពោះមធ្យោបាយបង្កត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុករលាប្អៀរ ដើម្បីទុកអនុវត្តតាមនីតិវិធី៕ ចន្ថា
