សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កញ្ញា ជីម សៀវ មុី ត្រូវចោរឆក់យកទូរស័ព្ទដៃបានសម្រេចហើយ ជិះគេចខ្លួនបាត់បណ្តាលអោយនារីរងគ្រោះរងរបួសស្រាលរត់ដៃរលាត់ជើង ។
ករណីនេះបានកើតឡើង កាលពីវេលាម៉ោង ១០ និង ១៥នាទីព្រឹកថ្ងៃទី១៩ ខែកុម្ភៈ ឆ្នាំ២០១៧ នៅចំណុចផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
នារីរងគ្រោះមានឈ្មោះ ជីម សៀវមុី អាយុ១៨ឆ្នាំ មុខរបរនិស្សិត ស្នាក់នៅផ្ទះជួលភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ និងមានស្រុកកំណើតភូមិផ្កាស្លា ឃុំចំការសំរោង ស្រុកបាត់ដំបង ខេត្តបាត់ដំបង ជិះម៉ូតូមួយគ្រឿងម៉ាក Zoomer X ពណ៌ស្វាយ ពាក់ស្លាក លេខ បាត់ដំបង 1Q-9771 ។
ប្រភពពីនារីរងគ្រោះបានអោយដឹងថា មុនពេលកើតហេតុ រូបនាងទើបចេញពីទិញម្ហូបផ្សារក្រមួន ហើយបានជិះម៉ូតូត្រឡប់ទៅផ្ទះវិញ ខណៈកំពុងតែធ្វើដំណើរតាមផ្លូវ ស្រាប់តែមានជនសង្ស័យម្នាក់ជិះបានជិះម៉ូតូមួយគ្រឿងមិនចាំម៉ាក ជិះមកពីក្រោយ ហើយបានធ្វើសកម្មភាពលូកដៃឆក់យកទូរសព្ទ័ម៉ាក IPhone 6plus ដែលដាក់ក្នុងហោប៉ៅខោបានសំរេច ហើយភ្លាមនោះនាងបានជិះម៉ូតូដេញតាមជនសង្ស័យរហូតដល់ចំណុចផ្លូវ១០០៧ នាងបានដួលម៉ូតូរលាត់ដៃជើង ចំណែកឯជនសង្ស័យបានជិះម៉ូតូរត់គេចខ្លួនបាត់ដោយសុវត្ថិភាព។
ក្រោយពេលកើតហេតុ ជនរងគ្រោះបានត្រូវប្រជាជននៅម្ដុំនោះជួយនាំយកទៅលាងរបួសនៅគ្លីនិកនៅជិតនោះ និងបាននាំជនរងគ្រោះយកទៅដាក់ពាក្យបណ្ដឹងនៅប៉ុស្ដិ៍នគរបាលរដ្ឋាបាលភ្នំពេញថ្មីដើម្បីកំណត់មុខសញ្ញាជនសង្ស័យស្វែងរកចាប់ខ្លួនយកមកចាត់ការតាមនីតិវិធី ៕ តុង សីហា
