សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានឧប្បត្តិហេតុគ្រោះថ្នាក់ចរាចរណ៍គួរឲ្យរន្ធត់មួយដោយបុរសជាប្តីរបួសដាច់ត្រឹមស្មងជើងស្តាំ ចំណែកប្រពន្ធរងរបួសធ្ងន់ ខណៈជិះម៉ូតូលឿនជ្រុល គេចមិនផុតរថយន្តកាមរីបាឡែនមួយគ្រឿងដែលកំពុងបត់ឆ្លងចូលព្រលានយន្តហោះ បណ្តាលឲ្យប៉ះនឹងកាងរថយន្តុំ
ឧប្បត្តិហេតុនេះកើតឡើងកាលពីវេលាម៉ោង២១និង៤០នាទីយប់ ថ្ងៃទី ១៩ ខែកុម្ភះ ឆ្នាំ២០១៧ នៅតាមបណ្តោយផ្លូវសហព័ន្ធរុស្ស៊ី មុខច្រកចូលព្រលានយន្តហោះថ្មី(ព្រលានយន្តហោះអន្តរជាតិភ្នំពេញ) ភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់ បើករថយន្តកាមរីបាឡែនពណ៌សពាក់ស្លាកលេខភ្នំពេញ 2AC-6108 មានដឹកភ្ញៀវជាជនជាតិបរទេសម្នាក់ នៅខាងក្រោយផងដោយធ្វើដំណើរតាមបណ្តោយផ្លូវសហព័ន្ធរុស្ស៊ី ទិសដៅពីកើតទីលិច។ខណៈធ្វើដំណើរមកដល់ចំណុចស្តុប មុខព្រលានយន្តច្រកចូលថ្មី រថយន្តមិនបានបត់ទេ ក៏ហួសទៅមុខបន្តិចតែក្រោយមកមិនដឹងនឹកឃើញយ៉ាងម៉េចស្រាប់តែរថយន្តបត់ ចូលក្នុងព្រលានយន្តហោះទាំងបង្ខំ ធ្វើឲ្យជនរងគ្រោះជិះម៉ូតូ ម៉ាកហុងដាឌ្រីមសេ១២៥ ពណ៌ខ្មៅស៊េរី០១៦ ពាក់ស្លាកលេខ ភ្នំពេញ 1FO-8268 ២នាក់ប្តីប្រពន្ធជិះស្របទិសគ្នាមកពីក្រោយយ៉ាងលឿន វ៉ាក់នឹងរថយន្ត ប៉ុន្តែម៉ូតូប្រឹងគេចដែរតែគេចមិនផុតក៏បានជ្រុលទៅប៉ះនឹងកាងខាងមុខរថយន្តបាឡែន បណ្តាលឲ្យជើងជនរងគ្រោះខាងស្តាំ បុកជាមួយដែកកាងខាងឆ្វេងនោះដាច់ត្រឹមស្មងជើង ធ្លាក់ជើងដាច់ជាពីរនៅក្រោមរថយន្តតែម្តង។ ចំណែកជនរងគ្រោះ ២នាក់ប្តីប្រពន្ធខ្ទាតជាង១០ម៉ែត្រពីរថយន្តរងរបួសធ្ងន់ ហើយ ភ្លាមនោះក៏មានប្រជាពលរដ្ឋជួយស្ទាក់រថយន្តជាប់ព្រមទាំងឃាត់អ្នកបើកបរបានផងដែរ ។
ក្រោយពេលកើតហេតុភ្លាម រថយន្តគ្លីនិកឯកជនរស្មី បានមកដឹកជនរងគ្រោះយកទៅសង្គ្រោះបន្ទាន់នៅមន្ទីរពេទ្យព្រះកុសុមៈ ចំណែកម៉ូតូរងគ្រោះ និងរថយន្តត្រូវបានសមត្ថកិច្ចមូលដ្ឋាន ខណ្ឌពោធិ៍សែនជ័យប្រគល់ឲ្យនគរបាលចរាចររាជធានី មកវាស់វែងយកទៅទុកនៅការិយាល័យនគរបាលចរាចរណ៍ផ្លូវគោក ដើម្បីរង់ចាំការដោះស្រាយតាមច្បាប់៕ ប្រាថ្នា
