សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ: មេធាវីការពារក្ដីលោក គឹម សុខ អ្នកឃ្លាំមើលបញ្ហាសង្គមនិងនយោបាយ បានប្តឹងនឹងដីកាសម្រេចឃុំខ្លួនកូនក្ដីហើយនៅថ្ងៃទី២១ ខែកុម្ភៈ តែតុលាការពុំទាន់សម្រេចយ៉ាងណានៅឡើយទេ ។
លោក ជូង ជូងី មេធាវីការពារក្ដីលោកគឹម សុខ ថ្លែង ថាលោកបានដាក់ពាក្យប្តឹងនឹងដីកាសម្រេចឃុំខ្លួនលោក គឹម សុខ រួចរាល់ហើយ ។ លោកមេធាវី ថ្លែងថា ក្នុងរយៈពេល៥ថ្ងៃយ៉ាងយូរ លោក រស់ ពិសិដ្ឋ ជាចៅក្រមស៊ើបសួរ នឹងសម្រេចអំពីពាក្យប្តឹងនេះ ។
គួររំលឹកថា លោក គឹម សុខ ត្រូវបានបញ្ជូនទៅឃុំខ្លួនក្នុងពន្ធនាគារព្រៃស ហើយ កាលពីរសៀលថ្ងៃទី១៧ ខែកុម្ភៈ ឆ្នាំ២០១៧ តាមបណ្តឹងមេធាវីតំណាងដោយអាណត្តិរបស់សម្តេចតេជោនាយករដ្ឋមន្ត្រី ដែលហ៊ានចោទ គណបក្សប្រជាជនកម្ពុជា ថា ជាអ្នកសម្លាប់លោកបណ្ឌិតកែម ឡី ។
លោក រស់ ពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនលោក គឹម សុខ បន្ទាប់ពីលោកព្រះរាជអាជ្ញារង សៀង សុខ សម្រេចចោទប្រកាន់ចំនួនពីរបទល្មើស គឺ ញុះញង់ឲ្យប្រព្រឹត្តបទឧក្រិដ្ឋជាអាទិ៍ និង បទបរិហារកេរ្តិ៍ជាសាធារណៈ តាមមាត្រា៤៩៤ មាត្រា៤៩៥ និង មាត្រា៣០៥ នៃក្រមព្រហ្មទណ្ឌ ។
បច្ចុប្បន្នលោក គឹម សុខ នៅជាប់បណ្តឹងមួយទៀត ដែលប្តឹងដោយសម្តេចតេជោ ដូចគ្នា គឺ ពាក់ព័ន្ធការដែលលោក គឹម សុខ បានចោទប្រកាន់ ថា រាជរដ្ឋាភិបាលកម្ពុជា បានបង្កើតប្រព័ន្ធសម្លាប់មនុស្ស រួចរកឃាតកមិនដែលឃើញ ។
ក្រោយអំពើឃាតកម្មលើលោកបណ្ឌិត កែម ឡី មានមនុស្សសំខាន់ៗបីនាក់ហើយ ដែលបានចោទប្រកាន់មកលើគណបក្សប្រជាជនកម្ពុជា ថា ជាអ្នកនៅពីក្រោយខ្នងនៃអំពើឃាតកម្មនេះ ។ ក្នុងនោះមានលោកស្រី ថាក់ ឡានី សមាជិកព្រឹទ្ធសភាគណបក្សសមរង្ស៊ី , លោក សម រង្ស៊ី ប្រធានគណបក្សសង្គ្រោះជាតិ ដែលទើបលាលែងពីតំណែង និង ចុងក្រោយ គឺ លោកគឹម សុខ អ្នកវិភាគនយោបាយ ដែលបច្ចុប្បន្នពួកគេទាំងបីនាក់ កំពុងប្រឈមមុខផ្លូវច្បាប់ ៕ ចេស្តា
